ე.წ. კონსილიუმი თავად არის ფეიკი და ავრცელებს ფეიკებს ტიკარაძის განცხადებაზე, – ამის შესახებ „ქართული ოცნების“ თავმჯდომარე ირაკლი კობახიძემ განაცხადა, რითაც შეაფასა ჯანდაცვის სამინისტროში გუშინ სახალხო დამცველის მიერ შექმნილ ექიმთა ჯგუფის წევრების ეკატერინე ტიკარაძესთან შეხვედრის შემდეგ გაკეთებული განცხადებები.

მისივე თქმით, კონსილიუმმა ტყუილი გაავრცელა.

„ეკა ტიკარაძეს აქვს თავისი პოზიცია. რაც შეეხება ე.წ. კონსილიუმს, რომელმაც განსხვავებული ინფორმაცია გაავრცელა, აქედანაც ჩანს, რომ ე.წ. კონსილიუმი თავად არის ფეიკი და ავრცელებს ფეიკებს ტიკარაძის განცხადებაზე, ტყუილი გაავრცელეს. ეს არის ფეიკი“, – განაცხადა ირაკლი კობახიძემ.

სახალხო დამცველის მიერ შექმნილი ექიმთა ჯგუფის ერთ-ერთმა წევრმა, ექიმმა, გიორგი გრიგოლიამ ჯანდაცვის სამინისტროში შეხვედრის შემდეგ განაცხადა, რომ ეკატერინე ტიკარაძის პოზიცია არის ისეთივე, როგორც ნებისმიერი ექიმის, ის იქცეოდა როგორც ექიმი და არა როგორც პოლიტიკური მოღვაწე. მისივე თქმით, დარჩა შთაბეჭდილება, რომ ტიკარაძე დაეთანხმა ყველა არგუმენტს, რაც შეხვედრაზე იყო იქ ნათქვამი.

1tv.ge