ჩვენ თუ რამეს ვულოცავთ ერთმანეთს, ქართველ ხალხს და სახელმწიფოს, ვულოცავთ იმას, რომ ქვეყანაში დესტაბილიზაციის, ქვეყნის ჩამოშლის, რევოლუციური მეთოდებით ხელისუფლებაზე ძალადობის, ხალხზე და სახელმწიფოზე ძალადობის გეგმა არ განხორციელდა. ე.წ. რეფერენდუმად გამოცხადებული ქვეყნის წინააღმდეგ დაუძინებელი ბრძოლის ქრონიკა არ შედგა, - ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა პლენარულ სხდომაზე განაცხადა.
როგორც ქადაგიშვილმა აღნიშნა, ადგილობრივი თვითმმართველობის არჩევნები თავის შინაარსს მეორე ტურში დაუბრუნდება.
„აქ ბევრჯერ გაჟღერდა რას ულოცავთ ერთმანეთსო, ერთ-ერთმა ექსპერტმა დღეს ოპოზიციას მიმართა - რა გიხარიათო? - ეს ალბათ, ანალოგიაა იმ სიხარულთან, რომელიც 2008 წლის აგვისტოში მოაწყვეს. ჩვენ თუ რამეს ვულოცავთ ერთმანეთს, ქართველ ხალხს და სახელმწიფოს, ვულოცავთ იმას, რომ ქვეყანაში დესტაბილიზაციის, ქვეყნის ჩამოშლის, რევოლუციური მეთოდებით ხელისუფლებაზე ძალადობის, ხალხზე და სახელმწიფოზე ძალადობის გეგმა არ განხორციელდა. ე.წ. რეფერენდუმად გამოცხადებული ქვეყნის წინააღმდეგ დაუძინებელი ბრძოლის ქრონიკა არ შედგა. ეს არის მისალოცი! ეს არჩევნები მეორე ტურში დაუბრუნდება იმ რეალურ შინაარსს, რასაც ჰქვია ადგილობრივი თვითმმართველობის არჩევნები. დემოკრატია სწორედ ნიშნავს პროცედურების და სისტემების, ინსტიტუციების მათზე მორგებული პროცესებით მართვას.
ეს თვითმმართველობის არჩევნები უნდა ყოფილიყო თვითმმართველობის არჩევნები, მაგრამ გადააქციეს ხელისუფლების შეცვლის არჩევნებად, რომელიც არ გამოუვიდათ. ვერც დივერსანტულ-კონტრაბანდისტული გზით შემოპარულმა ყოფილმა პრეზიდენტმა უშველათ, ვერც იმან უშველათ, მოულოდნელად გუნდის დატოვებით სახტად რომ დატოვა ისინიც, ვინც დღეს ჩვენ გვაკრიტიკებენ და გვეუბნებიან, რომ ყველა წინა არჩევნებში ყველაფერი კარგად იყო, სანამ ბატონი გიორგი გახარია ატარებდა არჩევნებს და ახლა გახდა ყველაფერი ცუდადო.
მეორე ტურში არჩევნები უბრუნდება თავის შინაარსს. 20-ვე მუნიციპალიტეტში მივაღწევთ დამაჯერებელ წარმატებას. ეს იქნება არა მარტო „ქართული ოცნების“ წარმატება, იქნება ქართული სახელმწიფოს წარმატება. ჩვენ მივიღეთ კანონები, რომელიც ოდესღაც ალბათ, მიგვიყვანს კოალიციურ მთავრობამდე“, - განაცხადა ქადაგიშვილმა.
ipn.ge