საქართველოში IT სერვისებზე მოთხოვნა მკვეთრად იზრდება. როგორც სპეციალისტები აღნიშნავენ, შრომის ბაზარი იცვლება ისე, რომ ავტომატურად ვითარდებიან ისეთი სფეროები, რომლებიც მაღალმწარმოებლური არიან და მეტი დამატებითი ღირებულების შექმნის რესურსი გააჩნიათ. შესაბამისად, წარმოებისა და მომსახურების სფეროში მეტი ტექნიკური საშუალებები გამოიყენება და ასეა მთელ განვითარებულ მსოფლიოში. ეკონომისტ ბესო ნამჩავაძის განცხადებით, ყველაზე მეტი პოტენციალი, რომ გახდეს ქვეყნის შემოსავლის მნიშვნელოვანი წყარო სწორედ IT ტექნოლოგიებს გააჩნია და წელს იგი ღვინის ექსპორტსაც გადააჭარბებს.
,,IT მომსახურებაში საზღვარგარეთიდან მიღებული შემოსავალი ბოლო 6 წელიწადში 28-ჯერ გაიზარდა და ვფიქრობ, წელს ღვინის ექსპორტიდან მიღებულ შემოსავალს გადაასწრებს, 200 მლნ დოლარზე მეტი იქნება. თან ღვინის ბიზნესის სუბსიდირებაში 100-ობით მლნ ლარს ვხარჯავთ, IT-ში არაფერს. ურჩიეთ თქვენს შვილებს საინფორმაციო ტექნოლოგიები ისწავლონ, ნუ ატყუებთ იურისტები, ეკონომისტები, ჟურნალისტები, უცხოენების სპეციალისტები და ა.შ. გემოვიდნენ, მაგათ ყველას ხელოვნური ინტელექტი ჩაანაცვლებს (ექიმების ნაწილსაც), რასაც სწორედ IT სპეციალისტები შექმნიან და განავითარებენ“, — აცხადებს ბესო ნამჩავაძე.
როგორც ,,ახალი ეკონომიკური სკოლის“ დამფუძნებელი პაატა შეშელიძე ,,კომერსანტთან“ ამბობს, IT ტექნოლოგიებით ახალგაზრდობის დიდი ნაწილია დაინტერესებული, რაც მოთხოვნის ზრდითაც აისახება და შესაძლებელია აქედან ქვეყანამ დიდი შემოსავალი მიიღოს.
,,ახალგაზრდობა ძირითადად კარგად ითვისებს ციფრულ პროგრამებს და საერთაშორისო დაკვეთებზე მუშაობს, რაც ნორმალურია და პერსპექტივაც დიდია. მთელი ხიბლი კი ისაა, რომ ნებისმიერი წერტილიდან შეგიძლია იმუშაო. სწავლის მსურველთათვის ბევრი კურსია გახსნილი, ძირითადად საერთაშორისო, ადგილობრივ დონეზე კადრების სერიოზული სიმცირე შეიმჩნევა. თუმცა ვისაც IT ტექნოლოგიების დაუფლება სურს, შეიძლება ისწავლოს ნაკლები დანახარჯით ანუ სწავლაც და გამოყენებაც ძალიან ხელმისაწვდომია. უნივერსიტეტებშიც ისწავლება პროგრამული ინჟინერიის კურსები, ეს-ეს არის ფეხს იდგამს ეს მიმართულება, ახალგაზრდობა დაინტერესებულია და შესაძლებელია აქედან ქვეყანამ დიდი შემოსავალი მიიღოს“, - აცხადებს პაატა შეშელიძე.
მისი თქმით, IT ტექნოლოგიების ექსპორტი დიდი პერსპექტივით გამოირჩევა, მაგრამ დარგს ჭირდება ხელშეწყობა, ელემენტარულად, ხელმისაწვდომი ელექტროენერგია, რის ფუფუნებაც ყველას არ აქვს.
,,ინტერესი დიდია ციფრული ტექნოლოგიების მიმართ, მაგრამ იმ რეალურად იმ ადამიანების რაოდენობა, ვინც ამას გააკეთებს, ჯერჯერობით არც ისე დიდია. გარდა ამისა, როცა ექსპორტის მასშტაბურ ზრდაზეა საუბარი, შეიძლება იგულისხმება მაინინგიდან მიღებული შემოსავალიც. თუ ეს ასეა, უკვე ელექტროენერგიასთან დაკავშირებული პრობლემა იკვეთება. განათლების ხელშეწყობა მნიშვნელოვანია, ადამიანები თვითონ იღებენ გადაწყვეტილებას, მაგრამ დენის ტარიფი უნდა იყოს შეღავათიანი, როცა ერთ კონკრეტულ ჯგუფზე ასეთი შეღავათი ვრცელდება, დისკრიმინაციული მიდგომაა. მოკლედ, არის გარკვეული ნიუანსები, რაც შეიძლება გამოსწორდეს“, - ამბობს ,,კომერსანტთან“ პაატა შეშელიძე.
ცნობისთვის, IT მომსახურებაში საზღვარგარეთიდან მიღებული შემოსავალი ბოლო 6 წელიწადში 28-ჯერ გაიზარდა. კერძოდ, საქართველოს შემოსავალმა ამ მიმართულებით 2021 წელს 153 მილიონი დოლარი შეადგინა. 2020 წელს ეს მაჩვენებელი 74 მილიონ დოლარს შეადგენდა, როცა 6 წლის წინ, 2015 წელს 5 მილიონს არ აჭარბებდა.
მარი ჩიტაია