"კაცმა თავი გადადო, ჩამოვიდა და შევიდა ციხის საკანში. ამას დაფასება სჭირდება და ქართველი ხალხი გვერდით უნდა დავუდგეთ," - ასე ეხმაურება ზუგდიდის მერობის კანდიდატი ანზორ მელია საქართველოს მესამე პრეზიდენტის მიხეილ სააკაშვილის დაკავებას.
ანზორ მელიას შეფასებით, გუშინ მთავრობამ თავისი უსუსურობა კიდევ ერთხელ დაგვანახა და მმართველი გუნდის ოფისში გამართული ბრიფინგი სამარცხვინო იყო.
,,მთავრობამ თავისი უსუსურობა გუშინაც დაგვანახა, ეს იყო საშინელება რაც გააკეთეს. ქვეყნის მესამე პრეზიდენტმა ჭაობიდან ამოიყვანა საქართველო და შექმნა ძლიერი სახელმწიფო, მათ დაანგრიეს და მოსპეს. ეს სამეული გუშინ რომ გამოვიდა, იყო სამარცხვინო გამოსვლა, კაცმა თავი გადადო, ჩამოვიდა და შევიდა ციხის საკანში. ამას დაფასება სჭირდება და ქართველი ხალხი გვერდით უნდა დავუდგეთ. მთელმა საქართველომ უნდა ამოიღოს ხმა იმიტომ, რომ ამის გაგრძელება შეუძლებელია, ასე საქართველო განადგურდება.
როგორ შეიძლება მესამე პრეზიდენტი შემოვიდეს ისე, რომ ოთხი დღე არ იცოდნენ სად იმყოფებოდა, ეს სახელმწიფო არ არის და ასე გაგრძელება არ შეიძლება”, - აღნიშნა ანზორ მელიამ.
ცნობისთვის, „ნაციონალური მოძრაობის“ ზუგდიდის მერობის კანდიდატმა ანზორ მელიამ ზუგდიდის პირველ საარჩევნო უბანში მისცა ხმა. მელიას თქმით, ყველამ უნდა ამოვიღოთ ხმა, რომ საქართველო გადავარჩინოთ.
„როგორც არასდროს ისეთი შემართებით ვარ, ეს არ არის მხოლოდ ადგილობრივი თვითმმართველობის არჩევნები, ეს არის რეფერენდუმი და წყდება საქართველოს მომავალი. გვინდა სიღარიბეში, სიბინძურეში ცხოვრება, თუ გვინდა სიყვარული, ურთიერთპატივისცემა, სამუშაო ადგილები და მატერიალური მდგომარეობის გაუმჯობესება? მაშინ ხმა უნდა მივცეთ ოპოზიციურ ძალებს. მინდა საქართველოში გათენდეს, ეს მთავრობა წავიდეს და მოვიდეს მხოლოდ კოალიციური მთავრობა, ეს არის ჩვენი ხსნა, ამიტომ არის, რომ 72 წლის კაცი იძულებული გავხვდი წინა ფრონტზე გამოვსულიყავი. ახლა ხმის არ ამოღება დანაშაულია, ყველამ უნდა ამოვიღოთ ხმა, რომ საქართველო გადავარჩინოთ”, - აღნიშნა ანზორ მელიამ.
წყარო: ინტერპრესნიუსი