რამდენიმე დღის წინ ჩეჩნეთის პრეზიდენტმა რამზან კადიროვმა „ინსტაგრამში“ პირდაპირი ეთერის დროს, საქართველოსთან დამაკავშირებელ საავტომობილო გზის მშენებლობის იდეაზე კიდევ ერთხელ ისაუბრა.

„ჩვენ ამ საკითხს აქტიურად ვაყენებთ, განვიხილავთ და თუ ალაჰის ნება იქნება, აუცილებლად ავაშენებთ“, – განაცხადა მან.

საუბარია საავტომობილო გზაზე, რომლის ნაწილიც რუსეთთან დაპირისპირებულმა ჩეჩნეთის რესპუბლიკის მთავრობამ თავისი ინიციატივით ააშენა, და მისი გაგრძელება საქართველო ტერიტორიაზე სურდა. თუმცა, ეს პროექტი 1999 წელს ჩაიშალა, როდესაც ჩეჩნეთის მეორე ომი დაიწყო, რის შედეგადაც გროზნოზე რუსეთის კონტროლი აღდგა.

ეს გზა თავის დროზე რუსული ბლოკადის გარღვევის და ჩეჩნეთის დამოუკიდებლობის კონტექტსში განიხილებოდა. 2014 წელს კი ყველასთვის მოულოდნელად ამ თემაზე ალაპარაკდა ჩეჩნეთის ამჟამინდელი პრეზიდენტი რამზან კადიროვი.

„სოფელ იტუმ–კალედან საქართველომდე სულ 40–50 წუთის გზაა და ეს უმოკლესი გზაა თურქეთისა და ევროპისკენ. ჩრდილოეთ კავკასიისთვის ეს ძალიან მნიშვნელოვანი პროექტია“, – განაცხადა მან.

2018 წელს ამ პროექტის მიზანშეწონილობის შესახებ რუსეთის საგზაო დეპარტამენტის უფროსმა რომან სტაროვოიტმა განაცხადა. ბოლო კი, უკვე 2019 წელს, ამ ინიციატივას თავის ყოველწლიურ პრეს–კონფერენციაზე მხარი თავად ვლადიმირ პუტინმა დაუჭირა – მისი თქმით, ამ გზის მშენებლობა მიზანშეწონილია და თუ იქნება შესაბამისი შეთანხმება ქართულ მხარესთან, ის უნდა აშენდეს.

თუმცა, ამ ეტაპზე საქმე განცხადებებს არ სცდება. ექსპერტის ალექსანდრე კვახაძეს თქმით, ამ პროექტის რეალიზებას დაახლოებით მილიარდი დოლარი სჭირდება, საქართველოს კი ასეთი თანხები არ აქვს, განსაკუთრებით პანდემიის ფონზე.

უცხოელი დონორები ამ ინიციატივას არ დააფინანსებენ, მით უმეტეს მაშინ, როდესაც საქართველოს მთავრობამ ჯერაც ბოლომდე არ ააშენა საერთაშორისო ორგანიზაციების მიერ დაფინანსებული მსხვილი საგზაო პროექტები – მაგალითად, თბილისი–ბათუმის მაგისტრალი.

თუმცა, მისი თქმით, უახლოეს პერიოდში ქართული მხარისგან განსაკუთრებული აქტიურობა ამ მიმართულებით მოსალოდნელი არაა.

„საქართველოში საზოგადოებრივი აზრი კატეგორიულად ეწინაამღდეგება ამ პროექტს, რადგანაც არსებობს შიში, რომ რუსეთმა ეს გზა შესაძლოა სამხედრო შემოჭრისთვის გამოიყენოს. ეს გადაჭარბებული შიშია იმ პირობებში, როდესაც რუსეთის ჯარი თბილისიდან 50 კილომეტრში, ახალგორში დგას და ჩეჩნეთის რთული გზა ამისთვის რუსეთს საერთოდ არ სჭირდება“, – მიიჩნევს კვახაძე.

ექსპერტის თორნიკე გორდაძის თქმით, ამ გზას საქართველოსთვის მნიშვნელობა ექნებოდა, ჩეჩნეთი რომ დამოუკიდებელი სახელმწიფო და თბილისის სტრატეგიული პარტნიორი ყოფილიყო  – ეს გზა ჩეჩნებს მსოფლიოსკენ გზას, რუსეთის გვერდის ავლით გაუხსნიდა.

დღეს კი თბილისისთვის ამ გზას არავითარი მნიშვნელობა არა აქვს.

„ამ გზასთან დაკავშირებით სკეპტიკურ დამოკიდებულებას აძლიერებს რამზან კადიროვის ფიგურა, რომელიც დღევანდელი საქართველოს პროდასავლურ კურსს მკვეთრად აკრიტიკებს. შესაბამისად, ამ გზის გახსნისთვის დრო ჯერ არ მოსულა და ალბათ მალე არც მოვა“,  – მიიჩნევს გორდაძე.

წყარო: ekhokavkaza.com