კანონის მიღების შემთხვევაში, უარს ვაცხადებთ აგენტად რეგისტრაციაზე – მედიაორგანიზაციები

2023-02-27 17:00:26

უცხოური გავლენის აგენტებთან დაკავშირებით უმრავლესობის დეპუტატებისგან შექმნილი პრორუსული მოძრაობის ახალ .კანონპროექტზე მედიაორგანიზაციები ერთობლივ განცხადებას ავრცელებენ. როგორც განცხადებაში ვკითხულობთ, კანონის მიღების შემთხვევაში, ისინი უარს ამბობენ აგენტად რეგისტრაციაზე, რადგან ეს პროფესიულ ღირსებას შეურაცხყოფს. განცხადებას უერთდება „კომერსანტიც“:

ჩვენ, განცხადებაზე ხელმომწერი მედიაორგანიზაციები, კატეგორიულად ვეწინააღმდეგებით საპარლამენტო უმრავლესობის წევრების მიერ ინიცირებულ რუსულ კანონპროექტებს უცხოური გავლენის აგენტების შესახებ.

მიგვაჩნია, რომ ამ კანონის მიზანია, აღარ ისმოდეს კრიტიკული ხმა, მედიამ და საზოგადოებრივმა ორგანიზაციებმა ვეღარ ასახონ ქვეყანაში არსებული კორუფცია, უსამართლობა და სიღარიბე.

ამას ადასტურებს წლების წინ რუსეთში მიღებული ანალოგიური კანონის შედეგები - დაიხურა სამოქალაქო და მედიაორგანიზაციები, ჟურნალისტები კი დევნის მსხვერპლნი გახდნენ. ამ კანონის მიღება აზიანებს ევროკავშირში გაწევრების პროცესს, რაზეც 24 თებერვლის განცხადებით ევროკავშირის უმაღლესმა წარმომადგენლობამ მკაფიოდ მიუთითა. შესაბამისად, წარდგენილი საკანონმდებლო ცვლილება საქართველოს განვითარებას აფერხებს და დღეს გაჩენილ შესაძლებლობის ფანჯარას ხურავს.

ჩვენ ვემსახურებით საზოგადოებას და გვაღელვებს ჩვენი ქვეყნის მომავალი. არ ვაპირებთ ამ იარლიყით მუშაობას. შესაბამისად, რუსული კანონის მიღების შემთხვევაში, უარს ვაცხადებთ უცხოური გავლენის აგენტად რეგისტრაციაზე. ეს შეურაცხყოფს ჩვენს პროფესიულ ღირსებას.

განცხადებას ხელს აწერენ:

netgazeti.ge

პუბლიკა (publika.ge)

ინდიგო

სტუდია მონიტორი

queer.ge

dev.ge

On.ge

ტაბულა

სამოქალაქო საქართველო - civil.ge

მედიაჩეკერი

პროექტი 64