კენიის ეროვნული ასამბლეის გარემოს დაცვის, სატყეო და სამთო კომიტეტის წევრებმა ივანიშვილისთვის ბაობაბების მიყიდვის საქმეზე გამოძიება დაიწყეს - ამის შესახებ ინფორმაციას ადგილობრივი მედია ავრცელებს.
გამოცემის ცნობით, ასამბლეის წევრებმა უკვე დაიბარეს გარემოს მართვის ეროვნული სააგენტოს მცენარეთა ინსპექტირების სამსახურის და კენიის სატყეო სამსახურის წარმომადგენლები. კანონმდებლები სავარაუდო კორუფციაზე საუბრობენ და პროცედურულ დარღვევებზეც მიუთითებენ, თუმცა საქმეში მონაწილე ორგანიზაციები ამტკიცებენ, რომ ხეები გადაშენების პირას მყოფი სახეობა არაა და შესაბამისად, მათით ვაჭრობა შესაძლებელია.
გამოძიება კილიფის ოლქის გარემოს დაცვის დეპარტამენტის მოთხოვნის საპასუხოდ მას შემდეგ დაიწყო, რაც Tezo MCA ტომ ჩენგომ ასამბლეას შუამდგომლობით მიმართა, რათა გაეგო, თუ როგორ ისარგებლებენ ადგილობრივები ამ გარიგებით, აღსანიშნავია, რომ ექვსი ბაობაბის ხე თეზოში, ხოლო ორი მაჯაონში, კილიფის ჩრდილოეთ ოლქში ამოძირკვეს.
საპარლამენტო კომიტეტმა, რომელსაც ბარინგოს სამხრეთის დეპუტატი ჩარლზ კამურენი ხელმძღვანელობს, კილიფის ოლქის ასამბლეის გარემოს დაცვის კომიტეტთან ერთად სხდომაც გამართა, სადაც ითქვა, რომ პროცესში ჩართული სახელმწიფო სააგენტოები ცდილობენ დეტალები დამალონ და უკანონობა მიჩქმალონ. მათივე განცხადებით, სააგენტოებმა არ დაიცვეს კონსტიტუციით გარანტირებული უფლება, რომ ამ ტიპის გადაწყვეტილებამდე ხელისუფლებამ მოლაპარაკება ადგილობრივებთან უნდა აწარმოოს და პროცესში მათი რჩევები და წუხილები გაითვალისწინოს.
კომიტეტის თავმჯდომარის თქმით, დადგება ყველა იმ პირის პასუხისმგებლობის საკითხი, ვინც პროცედურები დაარღვია და ინფორმაციის დამალვას ცდილობს. ადგილობრივი მედიის ინფორმაციით, ბაობაბებს კენიის ტერიტორია ჯერ არ დაუტოვებიათ.