მოჭადრაკე ნონა გაფრინდაშვილის ადვოკატების განცხადებით, მათი კლიენტი კმაყოფილია შედეგით, რომელიც დადგა საქმეზე "ნონა გაფრინდაშვილი Netflix-ის წინააღმდეგ".
დღეს, 7 სექტემბერს მედიისთვის გამართულ პრესკონფერენციაზე ადვოკატმა კახა შარაბიძემ, კონფიდენციალურობის პირობის თანახმად არ დაასახელა რა პირობით შედგა მხარეებს შორის შეთანხმება.
მისი სიტყვებით ამერიკის სააპელაციო სასამართლოს გადაწყვეტილება პრეცედენტულია იმდენად, რამდენადაც მან დაადგინა, რომ „მხატვრული ნაწარმოები არ წარმოადგენს დიფამაციისგან ანუ პატივისა და ღირსების შემლახველი განცხადებებისგან თავისუფალ ზონას და ეს არ ათავისუფლებს პირს პასუხისმგებლობისგან მხატვრული ნაწარმოების ფარგლებში განხორციელებული დიფამაციური განცდების გამო“.
კახა შარაბიძის განმარტებით, მორიგების თაობაზე მოლაპარაკების ინიციატივა წამოვიდა სასამართლოს მხრიდან, „სასამართლოს მიერ შერჩეული მედიატორის მეშვეობით განხორციელდა ეს პროცესი რაც შეთანხმების მიღწევით დასრულდა.“
"კმაყოფილები ვართ რომ შედეგი არის ქალბატონი ნონას ინტერესებში",- ამის შესახებ, ნონა გაფრინდაშვილის კიდევ ერთმა ადვოკატმა მაია მწარიაშვილმა განაცხადა. მისი თქმით, სარჩელზე შედეგი დადგა „სწრაფად და ეფექტურად“.
რაც შეეხება Netflix-ის სერიალის შინაარსის კორექტირებას, რაზეც ნონა გაფრინდაშვილი დაობდა, მაია მწარიაშვილის განცხადებით, შინაარსი უცვლელად დარჩება, თუმცა სასამართლო პროცესის შემდეგ ყველამ იცის, რომ „ნონა გაფრინდაშვილი არის ქართველი დიდოსტატი“, რომესაც ნათამაშები აქვს კაცი მოჭადრაკეების წინააღმდეგაც.
„მთავარი ამბავი იყო რომ სერიალში გავიდა არასწორი ინფორმაცია, რომ ქალბატონ ნონას არასოდეს უთამაშია კაცებს შორის და ის არის რუსი,რა მოცემულობაა დღეს - სრულიად მსოფლიო პრესა და არა მარტო საჭადრაკო საზოგადოება აშუქებს ამ მოვლენას უკვე მესამედ, პირველი იყო როდესაც სარჩელი შევიდა, მეორე იყო სასამართლო გადაწყვეტილება და დღეს. და აღარავის ეჭვი აღარ ეპარება დედამიწის ზურგზე, რომ ქალბატონი ნონა არის ქართველი საჭადრაკო ლეგენდა ეს შედეგი მიწეულია. უკვე ფორმალურია სერიალი, ყველამ იცის, რომ Netflix-მა არასწორი ინფორმაცია გადმოსცა სცენარში. თუ ადრე, საბჭოთა პერიოდში ქალბატონ ნონას საბჭოთა მოჭადრაკედ მოიხსენიებდნენ დღეს მას მხოლოდ ქართველ საჭადრაკო ლეგენდად მოიხსენიებენ და ჩვენ ქართველებმა ძალიან დიდი კვალი დავტოვეთ ამერიკის მართლმსაჯულების ისტორიაში, ამერიკულმა სასამართლომ პრეცედენტული გადაწყვეტილება მიიღო“,- განაცხადა მაია მწარიაშვილმა
საქმეზე "ნონა გაფრინდაშვილი Netflix-ის წინააღმდეგ", ორ მხარეს შორის შეთანხმება შედგა. მოჭადრაკე სასამართლოს გზით შეცდომის გასწორებასა და კომპენსაციას, $5 მილიონს ითხოვდა.
შეთანხმება მას შემდეგ შედგა, რაც იანვარში კალიფორნიის სასამართლომ უარყო Netflix-ის არგუმენტი, რომ არ შეიძლება უჩივლონ მხატვრულ ნაწარმოებში რეალური ადამიანის ცილისწამებისთვის.
დავა ეხება სერიალში გაჟღერებულ ფრაზას, რომელიც ნონა გაფრინდაშვილს შეეხებოდა. მხატვრულ ფილმში მოვლენები 1960-იან წლებში ვითარდება. ნიჭიერი ამერიკელი გოგონა ჩადის საბჭოთა კავშირში და ეთამაშება მთავარ მეტოქეს, მსოფლიოს მრავალგზის ჩემპიონს, რომლის პროტოტიპი სავარაუდოდ გარი კასპაროვია. პარტიის დასაწყისში კადრში ჩნდება ნონა გაფრინდაშვილის პერსონაჟი, ის დარბაზში სხვა მაყურებლებს შორის ზის, ჭადრაკის კომენტატორი კი ამბობს: "ერთადერთი, რაც [ფილმის მთავარი გმირისთვის] უჩვეულოა, მისი სქესია, მაგრამ რუსეთში არც ეს არის უნიკალური, აქ არის ნონა გაფრინდაშვილი, თუმცა, ის ქალთა შორის არის მსოფლიო ჩემპიონი და მამაკაცს არასდროს დაპირისპირებია“.
რეალურად, 1968 წლისთვის გაფრინდაშვილს უკვე ნათამაშები ჰქონდა სულ მცირე 59 კაც მოჭადრაკესთან, რომელთაგან 10 დიდოსტატის ტიტულს ატარებდა.
Netflix საქმის წარმოების შეწყვეტას იმ მოტივით ითხოვდა, რომ ფილმში არსებული ფრაზა, რომლის გამოც ქართველი მოჭადრაკე დავობს, გამოხატვის თავისუფლების ჩარჩოში ჯდება.
წყარო: radiotavisupleba.ge