თებერვალს, სასტუმრო რედისონ ბლუ ივერიაში გამართულ სფფ-ის XXXIII საარჩევნო ყრილობაზე, დელეგატებმა ფეხბურთის ფედერაციის პრეზიდენტად მესამე ვადით ლევან კობიაშვილი აირჩიეს. არჩევნებში კობიაშვილის გარდა არც არავინ მონაწილეობდა და მასში გამარჯვებით ის შეუერთდა „ერთკანდიდატიან არჩევნებში გამარჯვებულთა“ გუნდს, რომელშიც მის გარდა სამხატვრო აკადემიის რექტორი ყარამან ქუთათელაძე, თსუ-ს რექტორი ჯაბა სამუშია, კალათბურთის ფედერაციის პრეზიდენტი ვიქტორი სანიკიძე და სხვები არიან.
ამ თანამდებობაზე ის უკვე არჩეული იყო 2015 წლის ოქტომბერში, საკმაოდ ხმაურიან არჩევნებში მაშინ მისი მეტოქე რევაზ არველაძე იყო. 2019 წლის თებერვალში კობიაშვილს ამ პოსტზე მეტოქეც აღარ ჰყავდა და 29-ე საარჩევნო ყრილობაზე ხმათა აბსოლუტური უმრავლესობით იქნა არჩეული. იგივე მოხდა მესამე ჯერზეც. პარალელურად კობიაშვილმა 2 მოწვევის პარლამენტარობაც მოასწრო, 2016 წელს მან გლდანის მაჟორიტარობისთვის ბრძოლაში სერგო რატიანი დაამარცხა, 2020 წელს კი ნიკა მელია, (ამ შემთხვევაში სახელისუფლებო კანდიდატმა პირველ ტურში ოპოზიციის ერთიან კანდიდატზე ცოტა ხმები მიიღო, თუმცა მეორე ტური მაინც მისი გამარჯვებით დასრულდა.)
ბუნებრივია, ადამიანი, რომელიც 7 წელია ისეთი ფინანსური შესაძლებლობების და სპორტულ სფეროში ისეთი გავლენების მქონე ორგანიზაციას ხელმძღვანელობს, როგორიც ფეხბურთის ფედერაციაა, ყურადღების ცენტრშია და მის მიმართ მედიის ინტერესიც მაღალია.
მას შემდეგ რაც ლევან კობიაშვილი მესამედ იქნა არჩეული ფეხბურთის ფედერაციის პრეზიდენტად. კომერსანტი შეეცადა მისთვის რამდენიმე უწყინარი და საქმიანი კითხვა დაესვა. ონლაინ მედიის სპეციფიკიდან გამომდინარე 6 თებერვალს კითხვები გავაგზავნეთ ფეხბურთის ფედერაციის საზოგადოებასთან ურთიერთობის სამსახურში, შემდეგ ლევან კობიაშვილის სამსახურებრივ მეილზე პარლამენტში და სოციალურ ქსელებში. სამწუხაროდ ეს კომუნიკაცია კინოფილმიდან ცნობილი ფრაზის „მიწერ მოწერა გაქვთ ? - მიწერა კი, მოწერა არა“-ს დონეზე დარჩა.
ამიტომ კომერსანტი საჯაროდ უსვამს შეკითხვებს ფეხბურთის ფედერაციის სამგზის პრეზიდენტს.
ბატონო ლევან,
1. რას მიიჩნევთ 2015-2023 წლებში ქართული ფეხბურთის ყველაზე დიდ წარმატებად?
2. 2015-2023 წლებში თქვენი, როგორც პრეზიდენტის საქმიანობის ყველაზე გამორჩეულ მიღწევებად რას დაასახელებთ?
3. რას ჰპირდებით გულშემატკივარს მესამე პრეზიდენტობის პერიოდში?
4. როგორ დაიხარჯა ფეხბურთის განვითარების ფონდში არსებული თანხები და რა შედეგები დაიდო?
5. მიგაჩნიათ თუ არა, რომ სპორტული ფედერაციების საქმიანობა და ზოგადად სპორტი, როგორც დარგი, უნდა გათავისუფლდეს პოლიტიკური გავლენებისგან?