კრემლში არანაირ ზომებს არ მიმართავენ, მათ შორის იურიდიულს, ე. წ. სამხრეთ ოსეთის დე ფაქტო ლიდერის ანატოლი ბიბილოვის გეგმებთან დაკავშირებით რეფერენდუმის ჩატარებაზე, რომელზეც რუსეთთან მიერთებაზე იქნება დასმული კითხვა. ამის შესახებ რუსეთის პრეზიდენტის პრეს–მდივანმა დმიტრი პესკოვმა განაცხადა, წერს რუსული სააგენტო „რია ნოვოსტი“.

მიიღე ინფორმაცია უფრო სწრაფად „კომერსანტის“ Telegram-ზე.

„მე ვერანაირ პოზიციას ვერ გამოვხატავ, ამ მიმართულებით არც იურიდიული და არც სხვა ქმედებები არ გვაქვს გათვალისწინებული, მაგრამ ამავე დროს, ამ შემთხვევაში საუბარია სამხრეთ ოსეთის ხალხის ნების გამოხატვაზე, ჩვენ პატივს ვცემთ მას“, – ციტირებს პესკოვს რუსული სააგენტო.

მანამდე ცხინვალის რეგიონის სეპარატისტების ლიდერმა ანატოლი ბიბილოვმა განაცხადა, რომ ე.წ. სამხრეთ ოსეთი უახლოეს მომავალში დაიწყებს იურიდიული ნაბიჯების გადადგმას რუსეთის შემადგენლობაში შესასვლელად. მალევე ეს თემა ოკუპირებულ აფხაზეთშიც შეაფასეს და აღნიშნეს, რომ ასეთი განზრახვა სოხუმში არ გააჩნიათ.