აშშ-ის სახელმწიფო დეპარტამენტმა საქართველოს ყოფილ სახალხო დამცველ ნინო ლომჯარიას და მის გუნდს ადამიანის უფლებათა დამცველის გლობალური ჯილდო გადასცა. სახელმწიფო დეპარტამენტმა აღნიშნული ჯილდო ბოლოს 8 წლის წინ გასცა და წელს მსოფლიოს სხვადასხვა კუთხიდან 10 უფლებადამცველი დააჯილდოვა.
სახელმწიფო დეპარტამენტის საკუთარ ვებგვერდზე წერს, რომ ნინო ლომჯარია საქართველოს სახალხო დამცველის პოსტს 2017 წლიდან 2022 წლამდე იკავებდა. მისი ხელმძღვანელობით სახალხო დამცველის აპარატი (PDO) ფართოდ განიხილებოდა ყველაზე დამოუკიდებელ დემოკრატიულ ინსტიტუტად საქართველოში. მთელი თავისი მოღვაწეობის განმავლობაში ნინო ლომჯარია და მისი გუნდი მხარს უჭერდნენ ადამიანის უფლებების დაცვის გაძლიერებას ყველასთვის, ზოგჯერ ძლიერი პოლიტიკური ზეწოლის ქვეშ; მათ სრულად შეინარჩუნეს დამოუკიდებლობა. PDO-ის მუშაობა დისკრიმინაციის წინააღმდეგ ბრძოლისა და ბავშვების, შეზღუდული შესაძლებლობის მქონე პირების, პატიმრების, ლგბტქი+ პირებისა და რელიგიური უმცირესობების უფლებების დასაცავად, პოლიტიკური მიკერძოების გარეშე, ცდილობდა ხელი შეეწყო დემოკრატიული სახელმწიფოს მშენებლობისთვის, რომელიც შეესაბამება მისი მოქალაქეების ევროატლანტიკურ მისწრაფებები.
აშშ-ის სახელმწიფო დეპარტამენტის ჯილდოს მიღებას ნინო ლომჯარია სოციალურ ქსელში გამოეხმაურა, სადაც მადლობას უხდის სახელმწიფო დეპარტამენტის თანამშრომლებს და ამერიკის საელჩოს საქართველოში, რომლებმაც საშუალება მისცეს, ამ ჯილდოზე ევროპის რეგიონი წარმოედგინა.
„დღეს მქონდა პატივი მიმეღო ამერიკის სახელმწიფო დეპარტამენტის „2022 წლის ადამიანის უფლებების დამცველების გლობალური ჯილდო მე და ჩემი გუნდის მიერ გამოჩენილი სიმამაცისა და ლიდერობისთვის ადამიანის უფლებების დაცვის გზაზე. გამარჯვებულები სახელმწიფო მდივნის მოადგილემ, ურზა ზეიამ და სახელმწიფო მდივნის ასისტენტმა, ერინ ბარკლიმ დააჯილდოვა.
დიდი მადლობა ამერიკის სახელმწიფო დეპარტამენტის თანამშრომლებს და ამერიკის საელჩოს საქართველოში, რომლებმაც მხარი დამიჭირეს აღნიშნულ ჯილდოზე წარმომედგინა ევროპის რეგიონი.
დიდი მადლობა, რა თქმა უნდა სახალხო დამცველის აპარატის თითოეულ თანამშრომელს, ჩემ მოადგილეებს და ყველას, ვისთან ერთადაც ბოლო 5 წელი ვიბრძოდით ადამიანის უფლებების დასაცავად!“, - წერს ნინო ლომჯარია.