რუსეთის ლიბერალ–დემოკრატიული პარტიის ლიდერი ვლადიმირ ჟირინოვსკი საქართველოს ყოფილი პრეზიდენტის მიხეილ სააკაშვილის დაპატიმრებაზე ტელეგრამზე მისთვის დამახასიათებელი ცინიზმის შემცველ კომენტარს აქვეყნებს.
„სააკაშვილის დაპატიმრებასთან დაკავშირებით.
მიშიკო, რატომ წახვედი თბილისში? მოსკოვში რატომ არ ჩამოხვედი? ჩვენი პარტია ყველა ზომას მიმართავს შენს გასათავისუფლებლად. მაგრამ, მიშა, ჯერ უნდა გამაგრდე. მე ვიცი, რა მენიუ მოამზადა საქართველოს ხელისუფლებამ შენი ჩამოსვლისთვის: პირველი კერძი – აყროლებული თევზის კუდების წვნიანი, მეორე – კარტოფილის ნაფცქვენის პიურე და პირველი მსოფლიო ომის დროინდელი ფხვნილისგან მომზადებული კისელი.
აბა გაიხსენე, როგორ კარგად იკვებებოდი... მაგრამ, როგორც ჩანს, ერთი კარგი სიმღერა დაგავიწყდა: «Ешь ананасы, рябчиков жуй – день твой последний приходит, буржуй!». ესეც შენი დასასრული, მიშა.
არადა შეგეძლო მშვიდად გეცხოვრა მოსკოვში, შეხვდებოდი იანუკოვიჩს, ძველ არბატზე ნარდს ითამაშებდი, მაგრამ გაუმაძღრობამ გძლია“, – წერს ოდიოზური რუსი პოლიტიკოსი, კრემლის „რუპორი“ ვლადიმირ ჟირინოვსკი.
საქართველოს მესამე პრეზიდენტი მიხეილ სააკაშვილი, რომელიც უკრაინიდან საქართველოში დაბრუნდა, პოლიციამ თბილისში, ერთ–ერთ საცხოვრებელ სახლში დააკავა.