ვთხოვეთ, ვესაუბრეთ, რომ მან უნდა შეწყვიტოს შიმშილობა, თუმცა ბუნებრივია, ეს ადამიანი ამ პოზიციას არ იზიარებს, - ამის შესახებ ფრაქცია „ქართული ოცნების" თავმჯდომარემ მამუკა მდინარაძემ, პარლამენტის შენობაში მოშიმშილე დეპუტატის, ელენე ხოშტარიას მონახულების შემდეგ განაცხადა.

მისი თქმით, ორივე მხრიდან საკმაოდ გულწრფელი საუბარი იყო.

„ჩვენ ელენე ხოშტარიასთან გვქონდა საკმაოდ გულწრფელი საუბარი, გავცვალეთ არგუმენტები და ინფორმაციებიც. ჩვენი მხრიდან იქნა მიწოდებული ინფორმაციები გარკვეულ დეტალებთან დაკავშირებით, რაზეც საჯაროდ საუბარი გამიჭირდება და არ იქნება სწორი, თუმცა შემიძლია დაგიდასტუროთ, რომ გვქონდა საკმაოდ გულწრფელი საუბარი. ბუნებრივია, ამ ჩვენს თხოვნას, რომლებიც ჩვენ დღეს მასთან გვქონდა, რა თქმა უნდა, დადებითი პასუხი ვერ ექნებოდა და ასეთი მოლოდინიც არ გვქონდა. ვთხოვეთ, ვესაუბრეთ, რომ მან უნდა შეწყვიტოს შიმშილობა, თუმცა ბუნებრივია, ეს ადამიანი ამ პოზიციას არ იზიარებს - ორივე მხრიდან საკმაოდ გულწრფელი საუბარი იყო“, - განაცხადა მდინარაძემ.

ელენე ხოშტარია, დღეს ირაკლი კობახიძემ, შალვა პაპუაშვილმა და მამუკა მდინარაძემ მოინახულეს.

ელენე ხოშტარია მე-15 დღეა მიხეილ სააკაშვილის სამოქალაქო კლინიკაში გადაყვანის მოთხოვნით შიმშილობს.

ipn.ge