რა თქმა უნდა, ცნობები ამომრჩევლებზე ზეწოლაზე და ხმების დათვლის დროს დაშვებულ შეცდომებზე შემაშფოთებელია, - ამის შესახებ ევრონესტის ვიცე-თავმჯდომარემ და საქართველო-ევროკავშირის საპარლამენტო ასოციაციის კომიტეტის წევრმა, ევროპარლამენტარმა მარკეტა გრეგოროვამ „ინტერპრესნიუსს“ განუცხადა.
გრეგოროვას აზრით, არჩევნების შედეგები ქვეყნისთვის შესაძლოა, სახიფათო აღმოჩნდეს.
„არჩევნების ამჟამინდელი შედეგები გასაკვირი არ არის, თუმცა ქვეყნის სტაბილურობისა და მომავლის თვალსაზრისით შემაშფოთებელია. გამომდინარე იქიდან, რომ გამარჯვებულს ცალსახა უმრავლესობა არ მოუპოვებია და ოპოზიცია ერთმანეთთან თანამშრომლობს, "ქართულ ოცნებას" პარტნიორების მოძებნა პოლიტიკური სპექტრის განაპირა ნაწილში მოუწევს, რამაც შესაძლოა, ახალი დემონსტრაციები და უკმაყოფილება გამოიწვიოს როგორც ოპოზიციაში, ასევე მათსავე ამომრჩეველთა რიგებში“, - განაცხადა გრეგოროვამ.
როგორც ევროპარლამენტარი ამბობს, ინფორმაციები საარჩევნო პროცესთან დაკავშირებულ პრობლემებზე შემაშფოთებელია და ამაზე განმარტებები უნდა გაკეთდეს.
„რა თქმა უნდა, ცნობები ამომრჩევლებზე ზეწოლაზე და ხმების დათვლის დროს დაშვებულ შეცდომებზე შემაშფოთებელია. ამასთან დაკავშირებით მეორე ტურამდე განმარტებები უნდა გაკეთდეს და სახელმწიფომ უნდა უზრუნველყოს, რომ მსგავსი რამ აღარ განმეორდეს. საბოლოო ჯამში, ამ მომენტისთვის ცალსახა არაფერია, გამომდინარე აქედან, მნიშვნელოვანია, რომ ყველა ეჭვი საარჩევნო პროცესის სამართლიანობასთან დაკავშირებით გაიფანტოს და "ქართულ ოცნებასა" და ოპოზიციურ ბლოკს შორის კომუნიკაციისა და თანამშრომლობისთვის ხელსაყრელი გარემო შეიქმნას“, - განაცხადა ევროპარლამენტარმა.
IPN.GE
მარკეტა გრეგოროვა 
