ტესტირებისას 1500 ცხოველის მოკვლის შემდეგ, მასკის Neuralink-ს ფედერალური გამოძიება ემუქრება, წერს The Guardian-ი.
ტვინის იმპლანტის კომპანია Neuralink-ს ბრალს ცხოველებზე განხორციელებულ ზედმეტ ტანჯვასა და სიკვდილში სდებენ. აღნიშნულია ისიც, რომ დავალება ტესტირებების დაჩქარების შესახებ ელონ მასკისგან მოდიოდა.
The Guardian-ი წერს, რომ გამოძიება აშშ-ს სოფლის მეურნეობის დეპარტამენტის გენერალურმა ინსპექტორმა, პროკურორის მოთხოვნით, Neuralink-ის თანამშრომლების უკმაყოფილებისა და ჩივილის შემდეგ დაიწყო. ისინი აცხადებდნენ, რომ მასკის მიერ ზეწოლას განიცდიდნენ ცხოველებზე ტესტირებების დაჩქარებასთან დაკავშირებით, რამაც ბევრი წარუმატებელი შედეგი გამოიღო და მასკი მოითხოვდა და მოითხოვს, რომ ეს ექსპერიმენტები კიდევ და კიდევ განმეორდეს, რასაც უამრავი ცხოველის სიცოცხლე ეწირება.
მასკს და Neuralink-ის სხვა აღმასრულებლებს ამ საკითხზე კომენტარი არ გაუკეთებიათ. აღსანიშნავია, რომ არც USDA-ს გენერალური ინსპექტორის სპიკერს გაუკეთებია ამ საკითხზე კომენტარი. აშშ-ს კანონი არ აკონკრეტებს რამდენი ცხოველის გამოყენება შეუძლიათ კომპანიებს ამა თუ იმ კვლევისთვის. როგორც გამოცემა წერს, კანონმდებლობა მნიშვნელოვან თავისუფლებას აძლევენ მეცნიერებს, მათ შეუძლიათ თავად განსაზღვრონ როდის და როგორ გამოიყენონ ცხოველები ექსპერიმენტებში.
2018 წლიდან მოყოლებული ცდებისა და ტესტირებების შემდეგ კომპანიამ დაახლოებით 1500 ცხოველი შეიწირა, მათ შორის 280-ზე მეტი ცხვარი, ღორი და მაიმუნი. Neuralink-მა ასევე ჩაატარა კვლევა ვირთხებისა და თაგვების გამოყენებით, წერს The Guardian-ი.
შეგახსენებთ, რომ 2 კვირის წინ ელონ მასკმა სპეციალური პრეზენტაცია მოაწყო, სადაც განაცხადა, რომ მისი კომპიუტერული ტვინის ინტერფეის კომპანია Neuralink-ი ტვინის ჩიპის ადამიანის თავში იმპლანტაციას 6 თვეში დაიწყებდა. Neuralink-ი ავითარებს ტვინის ჩიპებს, რომლებსაც შეუძლიათ იმ ადამიანებსაც კი გამოუსწორონ მხედველობა, ვინც უსინათლო დაიბადა. მოწყობილობა ასევე აღადგენს სხეულის სრულ ფუნქციონირებას, მოძრაობას და ვერბალურ კომუნიკაციას, დაზიანებული ზურგის ტვინის შემთხვევაშიც. მასკმა პრეზენტაციაზე ისიც თქვა, რომ როცა შესაძლებელი იქნება ტვინის ჩიპს საკუთარ თავზე თავადაც გამოცდის.
მოამზადა მაკა ბიბილაშვილმა