უკრაინის მიმართ რუსული აგრესიის საფრთხემ კიდევ ერთხელ დაადასტურა ის გარემოება, რომ ქვეყნის უსაფრთხოება და არსებულ გამოწვევებთან ეფექტური გამკლავება სასიცოცხლოდ არის დამოკიდებული სახელმწიფოს, მისი ინსტიტუტების და საზოგადოების მედეგობის მაღალ ხარისხზე. აღნიშნული პირდაპირ გულისხმობს საგანგებო ვითარებების (ბუნებრივი თუ ტექნოგენური) და მათ შორის საომარი ვითარების პირობებში მართვის ეფექტური მექანიზმების არსებობას მიღებული ზიანის მინიმიზაციისთვის და საბოლოო ჯამში, ნორმალური ვითარების დაბრუნებისთვის.
მედეგობის პრინციპი ამასთან ერთად მოითხოვს ადაპტაციის და მიღებული გამოცდილების შესწავლის, გაანალიზების და გაუმჯობესების მიზნით შესაბამისი ნაბიჯების გადადგმას პოლიტიკისა თუ პრაქტიკულ განზომილებებში. ამ აუცილებლობაზე ასევე ამახვილებს ყურადღებას ჩრდილო-ატლანტიკური ალიანსი (NATO) დამფუძნებელი ქარტიის მესამე მუხლში და 2014 წლიდან გაჟღერებულ შვიდ ძირითად მოთხოვნილებების ფარგლებში, სადაც მკაფიოდ არის გატარებული ძირითადი იდეა, რომ ვერც სამხედრო და ვერც სამოქალაქო მზაობა ვერ იქნება გარანტირებული, თუ არ იქნება უზრუნველყოფილი საზოგადოებრივი ერთიანობა და სახელმწიფო ინსტიტუტების რეაგირების მაღალი ხარისხი.
აღნიშნულის გააზრება განსაკუთრებით მნიშვნელოვანია იმ ფონზე, როცა გლობალური მასშტაბით ანტიდემოკრატიულმა და ტოტალიტარულმა ძალებმა გააძლიერეს შეტევა დემოკრატიულ სახელმწიფოებზე, მათ ინსტიტუტებზე, თანამშრომლობის მექანიზმებზე და საზოგადოების შიდა ერთიანობაზე. სახიფათო ტენდენცია კიდევ უფრო გაძლიერდება თუ მას დასაწყისშივე არ გაეცემა საკადრისი პასუხი პოლიტიკის ყველა დონეზე.
შესაბამისად, საქართველოს უნივერსიტეტის უსაფრთხოების პლატფორმის კონფერენცია (UGSP-Conference 2022) “მედეგი სახელმწიფო-მედეგი საზოგადოება: რა ვისწავლეთ?“ მიზნად ისახავს მედეგობის პრინციპებისა და მექანიზმების გაანალიზებას სხვადასხვა განზომილებაში (სამხედრო, საინფორმაციო-ჰიბრიდული და საზოგადოებრივი) და მიღებული დასკვნების გაზიარებას აღნიშნული პრინციპების/მექანიზმების წარმატებულ ან წარუმატებელ განხორციელებაზე სხვადასხვა მაგალითების საფუძველზე. კონფერენცია დაყოფილია სამ პანელად:
პანელი-1 ( მედეგობა - სამხედრო/უსაფრთხოების განზომილება)
პანელი - 2 (მედეგობა - საინფორმაციო/ჰიბრიდულო განზომილება)
პანელი - 3 (მედეგობა - საზოგადოებრივი განზომილება)
კონფერენციაში მონაწილეობას იღებენ აკადემიური და ანალიტიკური სფეროს უმაღლესი რანგის სპეციალისტები და ასევე პრაქტიკული გამოცდილების მქონე პროფესიონალები (მაგ. გერმანიის თავდაცვის მინისტრის მრჩეველი დოქტორი კარლ-ჰაინც კამპი, გენერალი ბენ ჯოჯესი, დოქტორი გუსტავ გრესელი, მკვლევარი ნაძია კოვალჩიკოვა, დოქტორი ჯემს დერლეთი, დოქტორი სერიკ ბეიმენბეტოვი, გენერალი ფლორეან კოლდეა და აშ.)
კონფერენცია, რომელიც სასტუმრო „რუმსში“ მიმდინარეობს, 17:00 საათზე დაიხურება. კონფერენცია ჰიბრიდულ ფორმატში მიმდინარეობს და მასზე თვალის მიდევნება იქნება შესაძლებელი ონლაინ პლატფორმების, Facebook, Twitter, LinkedIn და http://ugsp.ug.edu.ge/ საშუალებით.