მომავალი წლის დასაწყისიდან ლიეტუვის მიგრაციის დეპარტამენტი მესამე ქვეყნებში დაიწყებს დროებითი ბინადრობის ნებართვების გაცემას პროვაიდერის მეშვეობით, - ამის შესახებ ლიეტუვის შსს-ს მიგრაციის დეპარტამენტის პრესსამსახურის მიერ გამოქვეყნებული ინფორმაციიდან ხდება ცნობილი.
ირკვევა, რომ სახელმწიფო შესყიდვის შედეგად ამისთვის შეირჩა VFS Global-ი, რომელიც მსოფლიოში აუთსორსინგის სერვისისა და ტექნოლოგიების უმსხვილესი კომპანიაა და მსგავს მომსახურებას მრავალი ქვეყნის მთავრობებსა და დიპლომატიურ მისიებს უწევს.
უცხოელებისთვის, რომელთაც სურთ მიიღონ დროებითი ბინადრობის ნებართვა ლიეტუვაში 2023 წლიდან, განაცხადების მიღება 2 იანვრიდან გაიხსნება 34 ქვეყანაში, სადაც კომპანიის ოფისები იმუშავებს.
„გარე სერვისის მიმწოდებელი უფლებამოსილია მიაწოდოს კლიენტებს ინფორმაცია დროებითი ბინადრობის ნებართვის გაცემის პროცედურის შესახებ, მიიღოს განაცხადები და სავალდებულო დოკუმენტები, შეაგროვოს პერსონალური და ბიომეტრიული მონაცემები და გადასცეს ისინი მიგრაციის დეპარტამენტის სპეციალისტებს. ყველა შემთხვევაში დროებითი ბინადრობის ნებართვის გაცემის ან არ გაცემის შესახებ გადაწყვეტილებას მიიღებენ მიგრაციის დეპარტამენტის სპეციალისტები. განცხადების განხილვასა და გადაწყვეტილების მიღებას დასჭირდება 1-დან 3 თვემდე“, - აცხადებენ ლიეტუვის მიგრაციის დეპარტამენტში.
გარდა ამისა, VFS Global-ს მოეთხოვება ლიეტუვის სახელმწიფო გადასახადის გადახდა მომსახურებისთვის. დროებითი ბინადრობის ნებართვაზე განაცხადის მიღებაში, შემოწმებაში, გადაწყვეტილების მიღებასა და დოკუმენტების გაცემაში, როგორც წესი, 120 ევროს იხდიან.
„მას შემდეგ რაც მიგრაციის დეპარტამენტის სპეციალისტები მიიღებენ გადაწყვეტილებას ლიეტუვაში დროებითი ბინადრობის ნებართვის გაცემის შესახებ, გაცემული ბარათი საზღვარგარეთ გაიგზავნება. ამრიგად, უცხოელი ლიეტუვაში უკვე მოქმედი ბინადრობის ნებართვით ჩავა და მას დამატებითი ვიზის აღება არ დასჭირდება. 2 იანვრამდე დროებითი ბინადრობის ნებართვის მისაღებად განაცხადის წარდგენა შესაძლებელია მხოლოდ ლიეტუვაში კანონიერი ჩასვლისა და მიგრაციის დეპარტამენტის მომხმარებელთა მომსახურების დეპარტამენტში შეხვედრის შემდეგ. თუ უცხოელს აქვს ვიზა, რომელიც იძლევა ჩვენს ქვეყანაში შემოსვლის უფლებას, ან იყენებს უვიზო რეჟიმს, მას შეეძლება აიღოს უკვე გაცემული დროებითი ბინადრობის ბარათი ლიეტუვაში“, - განმარტავენ მიგრაციის დეპარტამენტში.
უწყებაში ასევე განმარტავენ, რომ 2023 წლის 2 იანვრიდან „უცხოელთა სამართლებრივი მდგომარეობის შესახებ“ კანონში შედის ცვლილებები, რომლის მიხედვითაც დროებითი ბინადრობის ნებართვის გაცემის შესახებ განცხადებების განხილვის დრო 1 თვით მცირდება. ყველა უცხო ქვეყნის მოქალაქეს შეეძლება მიმართოს VFS Global-ის ოფისებს, იმისდა მიუხედავად, ცხოვრობენ თუ არა ისინი ქვეყანაში, სადაც ასეთი მომსახურების გაწევა ხდება.
1 იანვრიდან ეროვნული ვიზების გაცემის პროცედურა არ იცვლება. მათ მისაღებად, თქვენ კვლავ უნდა მიმართოთ გარე სერვისის პროვაიდერს, რომელიც შერჩეულია ლიეტუვის საგარეო საქმეთა სამინისტროს მიერ. ეს პროცედურა ძალაში იქნება 2023 წლის 1 ივლისამდე.
ქვეყნები, სადაც VFS Global-ს ოფისები აქვს: ალბანეთი, არგენტინა, სომხეთი, ავსტრალია, აზერბაიჯანი, ბრაზილია, კანადა, ინდოეთი, ისრაელი, იაპონია, იორდანია, ყაზახეთი, ყირგიზეთი, ლიბია, მალაიზია, მოლდოვა, ნეპალი, ახალი ზელანდია, ფილიპინები, სინგაპური, სამხრეთ აფრიკა, სამხრეთ კორეა, შრი-ლანკა, ტაივანი, ტაჯიკეთი, ტაილანდი, თურქეთი, უკრაინა, არაბთა გაერთიანებული საემიროები, გაერთიანებული სამეფო, ამერიკის შეერთებული შტატები, უზბეკეთი, ვენესუელა.