ამერიკული კომპანია Meta-ს ყოფილი თანამშრომლის თქმით, ის სამსახურიდან იმ ტესტირებაში მონაწილეობაზე უარის თქმის გამო გაათავისუფლეს, რომელიც Meta-ს მოხმარების გამოცდილებას აუარესებდა. ჯორჯ ჰეივორდმა სიმართლის დასადგენად სასამართლოს უკვე მიმართა.

ჰეივორდი კომპანიაში 2019-2022 წლებში მუშაობდა. ის იკვლევდა Meta აპლიკაციის ფუნქციების გავლენას იმ მოწყობილობების მუშაობაზე, რომლებსაც მომხმარებლები იყენებდნენ.

ჰეივორდის თქმით, ეს  ტესტირებები მომხმარებლის გამოცდილების მიზანმიმართული გაუარესებაა, რის შემდეგაც ანალიტიკოსები ანგარიშის მფლობელის ქცევას აკვირდებიან. მაგალითად, დეველოპერებს შეუძლიათ „აიძულონ“ Facebook  უფრო ნელა იმუშაოს, ნელა ატვირთოს ფოტო და ვიდეომასალა და ნელა გახსნას ბმულები. ამის მეშვეობით მკვლევრები აკვირდებიან მაგალითად, ლოდინის დროის ზრდასა და მომხმარებლის აქტივობას.

Meta, არხის მუშაობის შესამოწმებლად, ასევე სხვადასხვა მოწყობილობების მგრძნობელობისა და სურათის ატვირთვის დროის განსასაზღვრად, წლების განმავლობაში იყენებს „უარყოფით ტესტირებას“. მაგრამ ჰეივორდმა თქვა, რომ ასეთი ექსპერიმენტები არა მხოლოდ აუარესებს ათასობით მომხმარებლის Meta-სადმი დამოკიდებულებას, არამედ სმარტფონებისა და ტაბლეტების ბატარეებს უფრო სწრაფად ცლის.

მისი თქმით, კომპანია ადამიანების მობილურ მოწყობილობებს მათი თანხმობის გარეშე იყენებს. ჰეივორდი ასევე გააღიზიანა იმ ფაქტმა, რომ ბატარეის სწრაფი დაცლის გამო მომხმარებელს, საჭიროების შემთხვევაში, სასწრაფო დახმარების გამოძახებაც არ შეუძლია.

სწორედ ამ „უარყოფით ტესტებზე“ უარის თქმის გამო გაათავისუფლეს სამსახურიდან ჰეივორდი. რის შემდეგაც მან სიმართლის სასამართლოს გზით დადგენა გადაწყვიტა.