Meta აშშ-ის ყოფილი პრეზიდენტის დონალდ ტრამპის Facebook-სა და Instagram-ს უახლოეს კვირებში აღადგენს. Meta-ს გლობალური ურთიერთობების პრეზიდენტის ნიკ კლეგის თქმით, მომავალში წესების დარღვევის შემთხვევაში შესაძლოა ტრამპის ანგარიშები კვლავ წაიშალოს და ერთი თვიდან ორ წლამდე დაიბლოკოს.

„საზოგადოებას უნდა შეეძლოს იმის მოსმენა, რას ამბობენ პოლიტიკოსები - კარგს, ცუდს თუ სიმახინჯეს, რომ საარჩევნო ყუთთან გაცნობიერებული არჩევანის გაკეთების საშუალება ჰქონდეთ. თუმცა, ეს არ ნიშნავს იმას, რომ არ არსებობს შეზღუდვები. როდესაც აშკარა რისკის საფრთხეა, ჩვენ ვმოქმედებთ”, - განაცხადა ნიკ კლეგიმ.

ტრამპი Meta-ს გადაწყვეტილებას საკუთარ Truth Social პლატფორმაზე გამოეხმაურა:

„Facebook-მა თქვენი საყვარელი პრეზიდენტის „დეპლატფორმაციის“ შემდეგ, მილიარდობით დოლარი დაკარგა. ახლახან კი გამოაცხადა, რომ ჩემს ანგარიშებს აღადგენს. მათ მიმართ, ვინც შურისძიებას არ იმსახურებს, ვინც არ უნდა იყოს - მოქმედი პრეზიდენტი, თუ ნებისმიერი სხვა, მსგავსი რამ აღარასოდეს უნდა განმეორდეს!“ - წერს შეერთებული შტატების ყოფილი პრეზიდენტი.

ტრამპს არ დაუკონკრეტებია აპირებს თუ არა Meta-ს სოციალურ ქსელებში დაბრუნებას.

CNN-ის ინფორმაციით, ტრამპის გუნდს Meta-ს გადაწყვეტილება წინასწარ არ ეცნობა. მისმა ბევრმა თანაშემწემ და მრჩეველმა ამის შესახებ მედიისგან შეიტყო.

2023 წლის იანვრის დასაწყისში, ტრამპის საარჩევნო შტაბმა წერილი გაუგზავნა Meta-ს, სადაც ყოფილი პრეზიდენტის Meta-ს პლატფორმებზე დაბრუნებას ითხოვდნენ. CNN წერს, რომ ამის გათვალისწინებით, ტრამპის Instagram-სა და facebook-ზე დაბრუნება უფრო სავარაუდოა.