საქართველოში ევროკავშირის ქვეყნების ექსპორტი, 2022 წლის მაის-ივლისში, 2017-2019 წლების ანალოგიური პერიოდის საშუალო მაჩვენებელთან შედარებით, 19%-ით გაიზარდა. ამის შესახებ ევროპის რეკონსტრუქციისა და განვითარების ბანკის (EBRD) თებერვლის ანგარიშში წერია.

ექსპორტი, გაიზარდა ყირგიზეთში 84%-ით, სომხეთში 72%-ით, ტაჯიკეთში 21%-ით დაყაზახეთში 14%-ით, ხოლო ევროკავშირის ქვეყნებმა რეკორდულად შეამცირეს ტვირთბრუნვა რუსეთთან და ბელარუსთან, შესაბამისად, 56%-ით და 39%-ით. EBRD ამ ფაქტს ე.წ. პარალელურ იმპორტს და სანქციების გვერდის ავლაში რუსეთის მეზობელი ქვეყნების მონაწილეობას უკავშირებს.

ექსპერტების შეფასებით, რუსეთის იმპორტის სტრუქტურა სერიოზულად შეიცვალა და „არამეგობრული“ ქვეყნებიდან იმპორტს ჩინეთიდან იმპორტი ცვლის, ასევე, იზრდება ვაჭრობა მეზობელ ქვეყნებთან.  ანალიტიკოსების მონაცემებით, ისეთი ქვეყნებიდან, როგორიც არის საქართველო, სომხეთი და ყირგიზეთი, რუსეთში იმპორტის შემადგენლობაში მნიშვნელოვნად გაიზარდა ელექტროაღჭურვილობისა და მანქანების, ასევე, ავტომობილების სათადარიგო ნაწილების წილი.

ევროკავშირს ჯერ არ დაუდგენია სასჯელის ზომები იმ მესამე ქვეყნებისთვის, რომლებიც სანქციების გვერდის ავლაში მონაწილეობენ. თუმცა ევროკომისიამ გასული წლის ბოლოს სანქციების გვერდის ავლისთვის ჯარიმები დაამტკიცა და ფიზიკურ პირებს ხუთ წლამდე თავისუფლების აღკვეთით დაემუქრა, ხოლო კომპანიები შესაძლოა, იურიდიული პირის ბოლო ერთი წლის მთლიანი გლობალური ბრუნვის 5%-ის ოდენობით დაჯარიმდნენ.

EBRD.COM