ეკონომიკისა და მდგრადი განვითარების მინისტრი იმედს გამოთქვამს, რომ 2023 წლიდან ანაკლიაში სამშენებლო სამუშაოები და პორტის განვითარება დაიწყება. ამის შესახებ ლევან დავითაშვილმა მთავრობის სხდომის შემდეგ გამართულ ბრიფინგზე ისაუბრა.
„სამინისტრო მუშაობდა აქტიურად იმისთვის, რომ ანაკლიის პორტზე მუშაობა განახლებულიყონ საუკეთესო პირობებით ისე როგორც საქართველოს სახელმწიფოს ინტერესებშია. საბოლოოდ სექტემბრის თვეში მთავრობამ მიიღო გადაწყვეტილება და დაევალა სამინისტროს, რომ შეერჩია კონსულტანტი კომპანიები, რომლებიც ინვესტორების შერჩევის პირობებს სახელმწიფოსთან ერთად დაამუშავებდნენ. ასევე მთელი წლის განმავლობაში მიდიოდა შეხვედრები პოტენციურ ინვესტორებთან, ძირითად საპორტო ოპერატორებთან და ლოგისტიკურ კომპანიებთან, რომლებიც შეიძლება ჩართულიყვნენ პროექტის განხორციელების პროცესში სახელმწიფოსთან ერთად. ჩვენ დღეს მივიღეთ ძირითადი გადაწყვეტილება თუ როგორი სტრუქტურით მოხდება პორტის განვითარება. ასევე წლის ბოლომდე დასრულებული იქნება კონკურსის პირობების ჩამოყალიბება. იმედი გვაქვს, რომ მომავალი წლის იანვარში შერჩევის პროცესს განვახორციელებთ, ისე რომ 2023 წლიდან ჩვენ დავიწყოთ უშუალოდ სამშენებლო სამუშაოები და პორტის განვითარება,“ - განაცხადა ლევან დავითაშვილმა.
რას აქტივებს გულისხმობს სახელმწიფოს 51%-იანი თანამონაწილეობა ანაკლიის პორტის მშენებლობაში და რამდენად რეალურია საარბიტრაჟო დავების ფონზე მშენებლობის 2023 წელს დაწყება. ამასთან დაკავშირებით ეკონომიკის მინისტრმა განაცხადა, რომ პროექტის წარმატებით განხორციელება სავსებით რეალურია
„რაც შეეხება სახელმწიფოს თანამონაწილეობას, ეს თანხვედრაშია იმ პოლიტიკასთან, რომელიც ჩვენს გუნდს გააჩნია და ჩვენი გუნდი არაერთხელ საუბრობდა იმაზე, რომ მსხვილი, კრიტიკული ინფრასტრუქტურული პროექტები სახელმწიფოს მონაწილეობით და კონტროლით უნდა განხორციელდეს, ეს ხედვა გაზიარებულია ჩვენი საერთაშორისო პარტნიორების მიერ, მათ შორის სავალუტო ფონდის მიერ. კონკრეტული ფლაგმანი პროექტისა, არის ცალკე განხილვის საგანი. თანხაც შეფასებითად გვაქვს, უბრალოდ დღეს არ გავაჟღერებთ, ამაზეც ინფორმაციას რა თქმა უნდა მოგაწვდით. რაც შეეხება მეორე საკითხს ინვესტორის მოზიდვის კუთხით ოპტიმისტურად ვუყურებთ ამ სურათს. მიმდინარე საარბიტრაჟო დავა არ ეხება პროექტს, ეხება სახელმწიფოს, შესაბამისად ინვესტორები ან რისკისგან დაზღვეულია არიან, შესაბამისად არ დაველოდებით გადაწყვეტილებას,“ - აღნიშნა ლევან დავითაშვილმა.