საგაზაფხულო სესიის დღეს ეკატერინე ტიკარაძე საკანონმდებლო ორგანოში “მინისტრის საათის” ფორმატში მოუსმენენ. ტიკარაძესთან კითხვები აქვს პარლამენტის ფრაქცია „დამოუკიდებელი დეპუტატების“ თავმჯდომარის მოადგილეს ლევან კობერიძეს. პარლამენტარი აცხადებს, რომ დასვამს ისეთ კითხვებს რომელსაც აქამდეც სვამდა, თუმცა, პასუხები ამ დრომდე არ მიუღია.
„კითხვები შეეხება იმ თემებს, რომელზეც მთელი ამ დროის განმავლობაში ვსაუბრობდი. პირველი კითხვა შეეხება 520-ე დადგენილებას, რეფორმას, რომელმაც პრობლემები შეუქმნა პაციენტებს ხარისხიანი სერვისის მიღების თვალსაზრისით და სამედიცინო პერსონალს ხელფასების თვალსაზრისით. კითხვას დავსვამ საყოველთაო ჯანდაცვის პროგრამის ფარგლებში კლინიკებისთვის დაგროვილ დავალიანებაზე. მინისტრი აცხადებს, რომ მსგავს ფაქტს ადგილი არ აქვს, ამ დროს კლინიკებს დავალიანება რეალურად აქვთ, რაც ისე პაციენტზე და მედ პერსონალზე აისახება. კითხვა ასევე შეეხება მინისტრის ხედვას, ზოგადად, როგორ გეგმავს ჯანდაცვის სისტემის განვითარებას. ჯანდაცვის სამინისტოს არათანამიმდევრულმა ნაბიჯებმა საყოველთაო ჯანდაცვის რეფორმას პრობლემები შეუქმნა“, - განაცხადა ლევან კობერიძემ.
დეპუტატს არ აქვს მოლოდინი, რომ ეკატერინე ტიკარაძისგან ამომწურავ პასუხებს მიიღებს, რადგან მისი თქმით “მინისტრის საათის” ფორმატი არა ეფექტურია და საშუალებას იძლევა დასმულ კითხვებს მინისტრმა თავი აარიდოს. სწორედ ამიტომ ფრაქცია „დამოუკიდებელი დეპუტატების“ წევრები ეკატერინე ტიკარაძეს ჯანმრთელობის დაცვისა და სოციალურ საკითხთა კომიტეტის სხდომაზე ელოდებიან.
„მინისტრის საათი იმ ფორმატით რა ფორმატითაც არსებობს არ იძლევა საშუალებას მინისტრთან ან კონკრეტული თანამდებობის პირთან საკითხის დეტალებზე მოხდეს საუბარი, სწორედ ამიტომ, ჯანდაცვის მინისტრი დავიბარეთ ფრაქცია „დამოუკიდებელი დეპუტატების“ სახელით სწორედ კომიტეტის სხდომაზე. ახლა ცდილობს „ქართული ოცნების“ პიარ სამსახური მინისტრებს შეუქმნას კომფორტული გარემო, სადაც კითხვას სვამ და ორი საათი ელოდები პასუხს და რასაც უნდა იმას გიპასუხებს. ანუ მინისტრის საათი არის ძალიან არაეფექტური. ეს არის დამახინჯებული ფორმა ევროპაში არსებული მინისტრის საათის. მე დღეს მოლოდინი არ მაქვს მივიღებ ამომწურავ პასუხებს, ამიტომ მთავრი კითხვები ჯანდაცვის მინისტრს ჩვენგან ელოდება ჯანდაცვის კომიტეტზე“, - განაცხადა ლევან კობერიძემ.
ბაჩო ადამია