„ორბი ჯგუფი“ კურორტ ბახმაროში ტურისტული ინფრასტრუქტურის შექმნაზე მუშაობს, სადაც სტუმრების მიღებას 2024 წლის ზაფხულისთვის ვარაუდობს.

„ორბი ჯგუფმა“ ბახმაროში სახელმწიფო საკუთრებაში არსებული 43 269 კვ/მ არასასოფლო-სამეურნეო დანიშნულების მიწის ნაკვეთი და მათზე განთავსებული შენობა-ნაგებობები 2019 წლის მაისში სიმბოლურ ფასად, 1 ლარად იყიდა. ქონება „ორბი ჯგუფმა“ გარკვეული ვალდებულებების სანაცვლოდ შეიძინა და ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულ სააგენტოსთან 2019 წლის 17 ივლისს ნასყიდობის ხელშეკრულება გააფორმა.

„კომერსანტი“ დაინტერესდა როგორ ასრულებს ვალდებულებებს ინვესტორი და რა ეტაპზეა კურორტის განვითარების გეგმები, მაშინ როდესაც ადგილზე სამშენებლო სამუშაოები არ მიმდინარეობს.

კომპანიის ვებგვერდზე პროექტის მიმდინარეობის შესახებ ინფორმაცია განთავსებული არ არის. საიტზე ბახმაროს პროექტზე იძებნება მხოლოდ „ორბი ჯგუფის გენერალურ დირექტორის პანდემიამდე ჩაწერილი ინტერვიუ, სადაც ირაკლი კვერღელიძე აცხადებს, რომ პროექტის დასრულება 2021 წლისთვის იგეგმებოდა.

„კომერსანტი“ კომპანიასთან დაკავშირებას დიდი ხნის განმავლობაში ცდილობდა, თუმცა კომპანიის ხელმძღვანელი კავშირზე არ გამოდიოდა.

საბოლოოდ „კომერსანტმა“ დაკავშირება კომპანიის იურისტთან შეძლო, რომელმაც განაცხადა, რომ ამ დროისათვის პროექტირების ეტაპი სრულდება, რომელზედაც LLC Wilkinson Eyre Architects limited და MAD ARCHITECTSEUROPO მუშაობენ.

მალე „ორბი ჯგუფი ბახმარო“ განაცხადს გდგ-ზე შეიტანს, რომლის დამტკიცებაც წლის ბოლომდე ან მომავალი წლის დასაწყისში მოხდება.

როგორც ცნობილია, კლიმატური პირობების გამო ბახმაროში წლის განმავლობაში მშენებლობის ვადები შეზღუდულია, თუმცა კომპანიაში მიაჩნიათ, რომ არსებული კლიმატის გათვალისწინებით გაზაფხულზე სამშენებლო სამუშაოებს დაიწყებენ.

„ორბი ჯგუფი ბახმაროს“ იურისტი ამბობს, რომ არსებული ვადა პროექტის განხორციელებისთვის საკმარისია, თუმცა შესაბამისი არგუმენტების წარდგენის საფუძველზე შესაძლებელია ვადის გახანგრძლივებაც.

სსიპ სახელმწიფო ქონების ეროვნულ სააგენტოდან ოფიციალურად გამოთხოვილ ნასყიდობის ხელშეკრულებაში კი წერია, რომ ინვესტორი ვალდებულია გადაცემულ მიწის ნაკვეთზე პირადად ან მესამე პირის მეშვეობით ხელშეკრულების გაფორმებიდან მაქსიმუმ 60 თვეში უზრუნველყოს მრავალფუნქციური კომპლექსის მშენებლობა, რომელიც მოიცავს (მაგრამ შესაძლოა, არ შემოიფარგლებოდეს) მინიმუმ 120 ნომრის მქონე სასტუმრო(ებ)ს, კომერციული დანიშნულების ფართ(ებ)ს, კვების ობიექტ(ებ)ს; სპორტულ მოედანს/მოედნებს, ქონების ან მისი ნაწილის შემოღობვას, გამწვანებას, გარე განათებას.

შესაბამისად „ორბი ჯგუფი ბახმარო“ ვალდებულია პროექტი 2024 წლის ივნისის ბოლომდე დაასრულოს.

ასევე ინვესტორის ვალდებულებაა ხელშეკრულების გაფორმებიდან 10 წლის განმავლობაში ტერიტორიაზე არ განახორციელოს მრავალბინიანი საცხოვრებელი სახლის მშენებლობა.

იქვე ნათქვამია, რომ საპრივატიზებო პირობის შესრულების მიზნით ინვესტორმა არანაკლებ 50 მლნ ლარის (დამატებული ღირებულების გადასახადის გათვალისწინების გარეშე) ინვესტიცია უნდა განახორციელოს.

როგორც „ორბი ჯგუფის“ იურისტი აღნიშნავს, ხელშეკრულებაში ინვესტიციის მინიმალური რაოდენობაა მითითებული და რეალურად მოცულობა დღევანდელი გათვლებით 2-ჯერ მეტი იქნება.

„ორბი ჯგუფის“ Youtube არხზე განთავსებულ ინტერვიუში, რომელიც 2019 წლის 6 ივნისით თარიღდება კომპანიის ხელმძღვანელი ირაკლი კვერღელიძე აცხადებს, რომ სახელმწიფოს და კომპანიის მიზანია, ბახმარო 4 სეზონიან კურორტად იქცეს.

„შეიქმნას თანამედროვე, მაღალი ხარისხის ინფრასტრუქტურა და სერვისი, რაც საშუალებას მოგვცემს, ტურისტები მსოფლიოს სხვადასხვა ქვეყნიდან მოვიზიდოთ.

ჩვენი საინვესტიციო პროექტის მიხედვით აშენდება სასტუმრო კომპლექსი, საკონფერენციო დარბაზი, სპორტული მოედნები, რესტორნები, კაფეები; სპა და სპორტულ გამაჯანსაღებელი ცენტრები, მოეწყობა ვერტმფრენის დასაჯდომი ადგილი, დასასვენებელი პარკი, ატრაქციონები, რეკრეაციული ზონები, ბავშვთა გასართობი ცენტრი, ღია და დახურული აუზები, პარკინგი, და ა.შ. რაც კურორტს საშუალებას მისცემს ყოველწლიურად მოემსახუროს 300 000-ზე მეტ ტურისტს, რაც 20-ჯერ მეტია დღეს არსებულთან შედარებით და ამ მხრივ უნიკალური მოვლენაა არა მარტო ბახმაროსათვის, არამედ გურიისთვისაც. ეს იქნება უმაღლესი კლასის სასტუმრო კომპლექსი, რომელიც მოიზიდავს მაღალბიუჯეტიან ტურისტებს, რაც გურიის ეკონომიკისათვის მძლავრი სტიმული იქნება. იგი სოლიდურ შემოსავლებს მისცემს, როგორც ბიუჯეტს, ისე მოსახლეობას. სტაბილურად დასაქმდება ათასობით ადამიანი“, - აცხადებდა კვერღელიძე.

კომპანიის ხელმძღვანელი 2019 წელს ინვესტიციის ზრდასაც აანონსებდა, ხოლო 2021 წელს პროექტის დასრულების პირობასაც იძლეოდა.

„სახელმწიფოს წინაშე აღებული ვალდებულების შესაბამისად, ინვესტიციის მინიმალური მოცულობა 50 მილიონი ლარია, მაგრამ კომპანია აღნიშნულ პროექტში 100 მილიონ ლარზე მეტი ინვესტიციის დაბანდებას გეგმავს, სასტუმრო ნომრების ფონდი კი 120-დან 800 ნომრამდე გაიზრდება. აღნიშნული პროექტის ფარგლებში დასაქმდება 2 ათასამდე ადამიანი. მიმდინარე წელს ჩატარდება გეოლოგიური კვლევები, მოხდება პროექტირება და განხორციელდება სხვა მოსამზადებელი სამუშაოები, ხოლო მომავალი წლიდან აქტიურად დაიწყება მშენებლობის პროცესი, რომელიც 2021 წლისთვის დასრულდება.

დღემდე მსგავსი მასშტაბისა და ფუნქციონალური დანიშნულების პროექტი ბახმაროში არ განხორციელებულა, ეს არის პირველი პრეცედენტი“, - აცხადებდა 2019 წელს „ორბი ჯგუფი ბახმაროს“ ხელმძღვანელი ირაკლი კვერღელიძე.

2020 წლის დასაწყისისთვის პანდემიის დაწყებამ გლობალურმა ეკონომიკამ სერიოზული დარტყმა მიაყენა. ამას თან დაერთო მზარდი ინფლაცია და ბოლოს რუსეთ-უკრაინის ომი, რომელმაც ფასების ზრდა ეკონომიკის ყველა სეგმენტში განაპირობა. ამ ფონზე გაძვირდა მშენებლობებიც და შესაბამისად ინვესტორსაც პროექტის ღირებულება გაუძვირდებოდა. თუმცა რამდენად მოასწრებს „ორბი ჯგუფი“ 2024 წლის 17 ივნისამდე პროექტის რეალიზებას და მიმართავს თუ არა სახელმწიფოს ვალდებულებების გადავადებისთვის ამ დროისთვის უცნობია.