მოლოდინი გვაქვს, რომ თებერვალში ფასები უნდა შემცირდეს ძირითად სამომხმარებლო პროდუქტებზე, ვფიქრობ, მნიშვნელოვნად შემცირდება საწვავის ფასიც. ამის შესახებ ეკონომიკისა და მდგრადი განვითარების მინისტრმა, ლევან დავითაშვილმა საქართველოს პირველი არხის გადაცემაში „თავისუფალი ხედვა“ განაცხადა.

„იანვრის მონაცემებით 9,4% იყო. ევროზონის ინფლაციასთან ძალიან ახლოს ვიყავით. ორნიშნა ინფლაციის ეტაპი ალბათ დასრულდა და ინფლაცია უნდა იყოს კლებადი. განსაკუთრებით, მოლოდინი გვაქვს, რომ თებერვალში უნდა შემცირდეს ინფლაცია და ფასები უნდა შემცირდეს ძირითად სამომხმარებლო პროდუქტებზე“, – განაცხადა დავითაშვილმა.

მისი თქმით, მაღალ მარჟებზე, რაზეც პრემიერ-მინისტრმა ისაუბრა, იყო გარკვეული მიგნებები კვლევების შედეგად, რომელიც კონკურენციის სააგენტომ ჩაატარა.

„ხშირ შემთხვევაში იყო კითხვები, რომლებზეც მეტი დაზუსტება იყო საჭირო. ჩვენთვის მნიშვნელოვანია, არსებობდეს სრულყოფილად კონკურენტული გარემო, რომ ფასები იყოს ადეკვატური, ხელოვნურად არ იყოს გაზრდილი და კონკურენციის შეზღუდვამ არ განაპირობოს მოსახლეობის მდგომარეობის დამძიმება. რაც არ უნდა პროგრესზე და წარმატებებზე ვისაუბროთ ეკონომიკის კუთხით, ჩვენ გვესმის, რომ საკმაოდ მძიმე სოციალური ფონია და მაღალი ფასები მოსახლეობის ფაქტობრივად ყველა ფენისთვის არის ძალიან მძიმე. ბოლო წლები არ იყო მარტივი წლები, არა მხოლოდ საქართველოში, არამედ სხვა ქვეყნებშიც. ჩვენი საზრუნავია, რომ, ერთი მხრივ, მოსახლეობას ჰქონდეს შემოსავალი, მაგრამ ეს შემოსავალი იყოს ღირებული და არ უფასურდებოდეს ხელოვნურად გაზრდილი ფასების პირობებში“, – განაცხადა დავითაშვილმა.

როგორც დავითაშვილმა აღნიშნა, სამინისტროს მჭიდრო კოორდინაცია ჰქონდა კონკურენციის სააგენტოსთან და ეს პროცესი დღესაც მიმდინარეობს.

 „პრემიერ-მინისტრმა დავალება მისცა კაბინეტის რამდენიმე წევრს, ჩემი ჩათვლით, რომ ჩვენ ვიმუშაოთ ბიზნესებთან, კონკურენციის სააგენტოსთან ერთად. ამ პერიოდის განმავლობაში გვქონდა არაერთი შეხვედრა, რომლებიც, უბრალოდ, არ გაგვიშუქებია, მაგრამ მიმდინარეობდა ინტენსიური მუშაობა. შეხვედრები გვქონდა საწვავის იმპორტიორებთან და საცალო გამყიდველებთან. ვფიქრობ, თებერვლის ბოლომდე ძალიან მკაფიო შედეგები გვექნება – მნიშვნელოვნად შემცირდება საწვავის ფასები. ამაზე უკვე არსებობს შეთანხმება საწვავის მომწოდებლებთან და რეალიზატორებთან. კონკრეტულად გავაანალიზეთ როგორც მიმდინარე ტენდენციები, ისე პროგნოზები და სექტორმა ჩვენი ანალიზი გაიზიარა. შემცირების ტენდენცია დაიწყო და ვფიქრობ, თვის ბოლომდე საწვავის ფასები დაახლოებით 40 თეთრით უნდა შემცირდეს ძირითად საწვავ კატეგორიაზე, რეგულარის ტიპის ბენზინზე“, – განაცხადა დავითაშვილმა.

მისივე თქმით, ასევე არის სასურსათო პროდუქტებზე ფასების შემცირების ტენდენციის მოლოდინი.

„მიმდინარეობს მუშაობა კონკრეტულად იმპორტიორებთან და ასევე, საცალო ქსელების წარმომადგენლებთან. საზოგადოებას უფრო მეტ ინფორმაციას მომავალ კვირაში მივაწვდით“, – განაცხადა დავითაშვილმა.