ჩივნინგის სტიპენდიატები ე.წ აგენტების კანონთან დაკავშირებით განცხადებას ავრცელებენ და საქართველოს პარლამენტს მოუწოდებენ, არ მიიღოს აღნიშნული კანონი.
„ჩვენ, გაერთიანებული სამეფოს მთავრობის Chevening-ის სტიპენდიატები, ვეწინააღმდეგებით საპარლამენტო უმრავლესობის მხარდაჭერილ კანონპროექტებს “უცხოელი აგენტების რეგისტრაციის შესახებ” და “უცხოური გავლენის გამჭვირვალობის შესახებ” და მოვუწოდებთ საქართველოს პარლამენტს, არ მიიღოს კანონი, რომელიც ეწინააღმდეგება კონსტიტუციის პრინციპებსა და საქართველოს ევროპულ მომავალს.
მიზნობრივად და შინაარსობრივად რუსული კანონი საფრთხეს უქმნის საქართველოს თითოეულ მოქალაქეს, მათ შორის ახალგაზრდებს, ვისაც ევროპული განათლების მიღება მხოლოდ საერთაშორისო სტიპენდიებით შეუძლიათ. დასავლურ ორგანიზაციებთან თანამშრომლობის გამო აგენტის წოდება, პერსონალური მონაცემების შეუზღუდავი დამუშავება და დასმენებზე დაფუძნებული მონიტორინგი უხეშად ლახავს გაერთიანებისა და გამოხატვის თავისუფლებას, პირადი ცხოვრებისა და პერსონალურ მონაცემთა დაცვის უფლებას და დისკრიმინაციის აკრძალვას.
შემოთავაზებული კანონპროექტები ეწინააღმდეგება ქართველი ხალხის მისწრაფებას, გახდეს ევროკავშირის ოჯახის წევრი, ეწინააღმდეგება ევროკავშირის 12 რეკომენდაციას და შეუსაბამოა ევროპულ ნორმებსა და ღირებულებებთან, რაც ყველა საერთაშორისო პარტნიორმა ღიად დააფიქსირა. ეს კანონპროექტები მძიმე ჯარიმებითა და სისხლისსამართლებრივი პასუხისმგებლობით ემუქრება იმ სამოქალაქო ჯგუფებს, რომლებიც ადამიანის უფლებებისთვის, ქვეყნის ევროპული მომავლისთვის და დემოკრატიული ღირებულებებისთვის იბრძვიან.
საქართველოს ევროკავშირში ინტეგრაციის გადამწყვეტ ეტაპზე მსგავსი კანონის მიღება ჩვენთვის დიდი ხნით დახურავს ევროპული ოჯახის კარს.
ამრიგად, Chevening-ის სტიპენდიატები ვუერთდებით სამოქალაქო საზოგადოების აბსოლუტურ უმრავლესობას, მოვუწოდებთ გადაწყვეტილების მიმღებ პირებს, არ მიიღონ ანტიევროპული კანონი და იმოქმედონ საქართველოს მოქალაქეების ინტერესებისა და ქვეყნის ევროპული მომავლის სასარგებლოდ", - წერია გავრცელებულ განცხადებაში.
Chevening
