საქართველოს ახალგაზრდა იურისტთა ასოციაციის თავმჯდომარის, ნიკა სიმონიშვილის განცხადებით, ცესკო-ს თავმჯდომარის ახალი წესის შესაძლო გაუქმების შესახებ ირაკლი კობახიძის განცხადება გასაკვირი არ არის, რადგან „ქართულ ოცნებას“ პოლიტიკურ დღის წესრიგში ჰქონდა, რომ ცესკო-ს წევრები და თავმჯდომარე უბრალო უმრავლესობით დაენიშნა და არც კი უცდია კონსენსუსზე დაფუძნებით გადაწყვეტილების მიღება“.
როგორც ნიკა სიმონიშვილმა „ინტერპრესნიუსს“ განუცხადა, რეგულაცია, რომ ცესკო-ს თავმჯდომარე უბრალო უმრავლესობით დაინიშნოს, „ქართულ ოცნებას“ აწყობს, რადგან მას პარლამენტში 2/3 და 3/5 არ აქვს .
„ვნახეთ პროცესი, რომლის დროსაც, ცესკო-ს თავმჯდომარე და ორი პროფესიული წევრი აირჩია უბრალო უმრავლესობით. უბრალო უმრავლესობით არჩევა მოხდა ისე, რომ ვერც 2/3-ით, ვერც 3/5-ით ამ ადამიანებმა მხარდაჭერა ვერ მიიღეს და საბოლოოდ უბრალო უმრავლესობით გახდა ამ საკითხზე გადაწყვეტილების მიღება საჭირო. მეც, რომელიც შესარჩევ კომისიაში ერთ-ერთი წევრი ვიყავი, მხარი დავუჭირე იმ კანდიდატებს, რომელთა დაკავშირებითაც ვფიქრობდი, რომ შეიძლებოდა კონსენსუსზე დაფუძნებით გადაწყვეტილების მიღება. თუმცა ჩვენ ვნახეთ, რომ „ქართულ ოცნებას“ პოლიტიკურ დღის წესრიგში ჰქონდა ის, რომ ცესკო-ს წევრები და თავმჯდომარე დაენიშნა უბრალო უმრავლესობით და არც კი უცდია კონსენსუსზე დაფუძნებით გადაწყვეტილების მიღება. როდესაც ჩვენ ვსაუბრობთ, რომ კონსესუნსზე დაფუძნებით უნდა მივიღოთ გადაწყვეტილება, რა თქმა უნდა, ამ ყველაფერს წინ უნდა უძღოდეს გარკვეული პოლიტიკური შეთანმხება ამ საკითხთან დაკავშირებით, მაგრამ ამ პროცესში ვერ ვნახეთ დიალოგი, რომ საუბარი ყოფილიყო ამ კანდიდატებთან დაკავშირებით კონსენსუსზე. დავინახეთ, რომ „ქართულ ოცნებას“ თავიდანვე ჰქონდა განზრახული, რომ ეს პირები დანიშნულიყვნენ უბრალო უმრავლესობით. ჩანაწერი, რაც კანონში გვაქვს - ორჯერ 2/3-ით, შემდეგ 3/5-ით და საბოლოოდ უბრალო უმრავლესობით არჩევა, ფაქტობრივად „ქართულმა ოცნებამ“ ფორმალურად გაიარა - გაიარა კვალიფიციური უმრავლესობით არჩევის შეუძლებლობის გზა და მივიდა უბრალო უმრავლესობამდე. ეს არის რეალურად ის რეგულაცია, რომელიც „ქართულ ოცნებას“ აწყობს, იმიტომ, რომ მას პარლამენტში არც 2/3 აქვს, არც 3/5 და ეს არის შესაძლებლობა, რომლითაც ის მიიღებს სასურველ გადაწყვეტილებას ზედმეტი ფორმალური გართულებების გარეშე.
აქედან გამომდინარე, უბრალოდ არ მიკვირს, რომ საუბარი მიდის არსებული წესის შეცვლაზე, რომელიც 19 აპრილის შეთანხმებიდან მომდინარეობდა. არ არის გასაკვირი „ქართული ოცნების“ განცხადება იმასთან დაკავშირებით, რომ ეს წესი შეიძლება შეიცვალოს და ეს ყველაფერი დაუკავშირონ სწორედაც 19 აპრილის შეთანხმების ანულირებას. ჩვენ ეს ანულირება უარყოფითად შევაფასეთ, თუმცა ასევე უარყოფითი გავლენა ექნება პროცესებზე, თუ არსებული წესი შეიცვლება. უნდა შეიცვალოს არსებული ცუდი პრაქტიკა, რომელიც ცესკო-ს თავმჯდომარის და წევრების არჩევის პროცესში იყო, რომ „ქართული ოცნება“ თავიდანვე ორიენტირებული იყო, რომ გადაწყვეტილება უბრალო უმრავლესობით მიეღო, ყოველგვარი პოლიტიკური დიალოგისა და კონსენსუსის გარეშე. აქედან გამომდინარე, მნიშვნელოვანია, ვისაუბროთ არა იმაზე, რომ შეუძლებელია ოპოზიციასთან შეთანხმების მიღწევა და ამის გამო წესი უნდა შეიცვალოს, არამედ, საუბარი უნდა იყოს იმაზე, რომ ხელისუფლებამ მეტი დიალოგი უნდა სცადოს ოპოზიციასთან რათა მნიშვნელოვან საკითხებზე გადაწყვეტილება ერთობლივად იქნეს მიღებული. ჩვენ კი ასეთი დიალოგი და პოლიტიკური კონსენსუსის მიღწევის მცდელობა ცესკო-ს თავმჯდომარის და წევრების არჩევის ბოლო პროცესში ვერ ვნახეთ.
პროცესმა, რაც ცესკო-ს თავმჯდომარის და წევრების არჩევას უკავშირდებოდა, აჩვენა ხელისუფლების პოლიტიკური სურვილი, რომ სურდა, ერთპიროვნულად ჰქონოდა ეს ძალაუფლება ხელში, როგორც აქვს უზენაესის სასმაართლოს მოსამართლეებთან მიმართებით, რაც წარმატებით გამოიყენა, რომ უზენაეს სასამართლოში 6 წევრი ყოველგვარი პროცედურული გართულების გარეშე დანიშნა. იგივე სურს. რეალურად ამის შესაძლებლობა დღესაც აქვს, უბრალოდ, უფრო დიდი პროცედურის გავლა უწევს, ვიდრე ეს მოუწევდა იმ პირობებში, როგორიც ამ ცვლილებებამდე იყო“,- განაცხადა სიმონიშვილმა.
შეგახსენებთ, რომ „ქართული ოცნების“ თავმჯდომარე ირაკლი კობახიძე არ გამორიცხავს, რომ ცენტრალური საარჩევნო კომისიის თავმჯდომარის არჩევის ახლახან მიღებული წესი ისევ გადაიხედოს.
როგორც ირაკლი კობახიძემ „პალიტრანიუსის“ გადაცემა „დღის ნიუსრუმში“ განაცხადა, აღნიშნულმა წესმა პრაქტიკაში არ იმუშავა და „როცა რაღაც ირაციონალურია, შესაბამის ნორმას გადახედვა სჭირდება“.
ipn.ge