Nokia-მ გამოაცხადა, რომ მთვარეზე გაგზავნის აღჭურვილობას მომავალი კოსმოსური მისიის დროს 4G ქსელის განსათავსებლად. კომპანია იმედოვნებს, რომ ეს ნაბიჯი გზას გაუხსნის ახალ აღმოჩენებს და შექმნის შესაძლებლობებს ადამიანის არსებობისთვის მთვარეზე და მის ფარგლებს გარეთ. ამის შესახებ Cnbc წერს.

ფინური სატელეკომუნიკაციო ჯგუფი გეგმავს ქსელის გაშვებას SpaceX-ის რაკეტაზე უახლოეს თვეებში, განუცხადა ჟურნალისტებს ლუის მაესტრო რუის დე ტემინომ, Nokia-ს მთავარმა ინჟინერმა ამ თვის დასაწყისში ბარსელონაში Mobile World Congress სავაჭრო შოუზე.

Nokia-მ იმუშავა Lunar Outpost-თან და Intuitive Machines-თან, რათა შეექმნა 4G აპარატურა საიმისოდ, რომ კოსმოსის მძიმე პირობებში იმუშაოს. ის შესაძლოა სასარგებლო აღმოჩნდეს მთვარეზე დაგეგმილი არტემისის მისიებისთვის. NASA-ს გეგმა ითვალისწინებს ორი ასტრონავტის გაშვებას მთვარეზე 2025 წელს. ისინი იქნებიან პირველი ასტრონავტები, რომლებიც დაეშვებიან მთვარეზე 1972 წლის Apollo 17 მისიის შემდეგ.

Nokia-მ ამის შესახებ ინფორმაცია 2020 წელს გააკეთა, როდესაც NASA-მ ის პროექტისთვის აირჩია. ამის შემდეგ მის ლაბორატორია Bell Labsს 14,1 მილიონი დოლარი გამოეყო პროექტის დასაფინანსებლად. კომპანიამ განაცხადა, რომ პირველად შეამოწმებს მოკლე და შორ მანძილზე კომუნიკაციის შესაძლებლობებს რამდენიმე ასეული მეტრიდან ორ-სამ კილომეტრამდე.

„ჩვენთვის ნათელი გახდა, რომ მომავალში მთვარეზე და მარსზე ადამიანის ნებისმიერი გრძელვადიანი ყოფნისთვის, კავშირი და კომუნიკაციები გადამწყვეტია“, - თქვა ტიერი კლეინმა, Nokia Bell Labs-ის Bell Labs Solutions Research-ის პრეზიდენტმა.

კლაინმა დასძინა, რომ ასტრონავტებს ისეთივე წვდომა უნდა ჰქონდეთ ტექნოლოგიებზე, როგორც დედამიწაზე აქვთ იმისათვის, რომ თავიანთი აპლიკაციები კოსმოსში ჩაუშვან. იდეალურ შემთხვევაში, მომავალ მისიებში ასტრონავტები 4G ინტერნეტსაც გამოიყენებენ.

კომპანია იმედოვნებს, რომ შეძლებს დახმარების გაწევას კვლევებსა და ექსპერიმენტებში მთვარეზე ყინულის პოვნის კუთხით, რაც ასტრონავტებს ჟანგბადით, სასმელი წყლითა და სარაკეტო საწვავით უზრუნველყოფს.

გასული თვის ბოლოს გავრცელებულ პრესრელიზში ტიერი კლაინი აცხადებდა, რომ Nokia და Bell Labs მოუთმენლად ელიან მომავალ წელს ტექნოლოგიის კოსმოსში გატანას. მან თქვა, რომ 4G ქსელს „დიდი გავლენა ექნება მომავალ პილოტირებულ მისიებზე მთვარეზე და მის ფარგლებს გარეთ და ასევე დაადასტურებს, რომ ფიჭური ტექნოლოგია შეიძლება ადაპტირდეს კოსმოსური კომუნიკაციების კრიტიკულ საჭიროებებზე“.