ფრაქცია „ქართული ოცნების” თავმჯდომარე მამუკა მდინარაძის განცხადებით, მმართველი პარტია მხარს დაუჭერს კანონპროექტს „უცხოური გავლენის აგენტების შესახებ”. ამის შესახებ მდინარაძემ „ოცნების” ოფისში გამართულ ბრიფინგზე განაცხადა.
„ფრაქცია „ქართული ოცნების“ სახელით შემიძლია ვთქვა, რომ პრინციპების დონეზე ჩვენ შევთანხმდით და კანონპროექტს მხარს დავუჭერთ. რა თქმა უნდა, დეტალებზე გაგრძელდება მსჯელობა”, — განაცხადა მდინარაძემ.
„თუკი პრინციპებზე ვსაუბრობთ, არ უნდა დაგვავიწყდეს, რომ ათასგვარი სპეკულაცია მოჰყვა სხვადასხვა ქვეყანასთან მიმართებაში, მათ შორის ოკუპანტი ქვეყნის კანონმდებლობაზეც იყო მითითება და შემიძლია მთელი პასუხისმგებლობით ვთქვა – თუკი ვინმე, ვინც არ უნდა იყოს, ამბობს, რომ ეს არის რუსული კანონმდებლობის ანალოგი, ის უბრალოდ იტყუება.
რა თქმა უნდა, ეს არ არის არც ამერიკული კანონმდებლობის ანალოგი, იქიდან გამომდინარე, რომ ერთ და მეორე შემთხვევაშიც არის უამრავი შეზღუდვა და თუკი ვინმე დააპირებს, რომ ამ შეზღუდვების ანალოგი მოიტანოს იმ პროექტში, რომელიც „ხალხის ძალამ“ წარმოადგინა, ამას ერთი მიზეზის გამო ვერ შეძლებს: არც ერთი შეზღუდვა „ხალხის ძალას” არ ჩაუწერია კანონპროექტში”.