უკრაინაში რუსეთის ჯარების ინტერვენციის მეხუთე დღეა. ამ დროის განმავლობაში ვლადიმირ პუტინის არმია ბომბავს დასახლებულ პუნქტებს, საავადმყოფოებს, სკოლებსა და საბავშვო ბაღებს. რუსული სამხედრო აგრესიის გამო უკრაინაში ასობით მშვიდობიანი მოქალაქე დაიღუპა და დაიჭრა.
დანაკარგები აქვს პუტინის რუსეთსაც, თუმცა ადამიანური დანაკარგის გარდა ოკუპანტ ქვეყანას მნიშვნელოვანი ფინანსური ზარალი აქვს. მცირდება რუსი ოლიგარქების ქონებაც.
Forbes-ის მილიარდერების სიის მიხედვით, ბოლო ერთ კვირაში ათმა ყველაზე მდიდარმა რუსმა ბიზნესმენმა $19,2 მილიარდი დაკარგა. აღსანიშნავია ისიც, რომ დანაკარგებთან ერთად მათი რეიტინგიც შეიცვალა.
რუსეთის ყველაზე მდიდარი ადამიანის სტატუსი PJSC Severstal–ის დირექტორთა საბჭოს თავმჯდომარემ ალექსეი მორდაშოვმა მოიპოვა. 22 თებერვლიდან დღემდე კრემლის ერთგული ბიზნესმენის ქონება მხოლოდ $200 მლნ-ით – $29.1 მილიარდამდე შემცირდა.
$27 მილიარდით მეორე ადგილის Interros Holding-ისა და MMC Norilsk Nickel-ის პრეზიდენტი ვლადიმირ პოტანინი იკავებს. პუტინთან დაახლოებული მილიარდერი ოლიგარქის ქონება $1,2 მილიარდით შემცირდა.
რუსეთის ყველაზე მდიდარი ადამიანის სტატუსი დაკარგა ვლადიმირ ლისინმა. კომპანია Novolipetsk Metallurgical Plant-ის დირექტორთა საბჭოს თავმჯდომარის ქონება ბოლო ერთ კვირაში $ 3,82 მილიარდით შემცირდა. გამოცემა 65 წლის ბიზნესმენის ქონებას $26,2 მილიარდად აფასებს.
მეექვსე ადგილიდან მეოთხე ადგილზე გადმოინაცვლა კომპანია NK „Lukoil“-ის პრეზიდენტმა ვაგიტ ალეკპეროვმა. ყველაზე მდიდარ 10 რუს ოლიგარქს შორის ის იმ გამონაკლისებს ეკუთვნის, ვისი ქონებაც $ 24.4 მილიარდიდან $24,9 მილიარდამდე გაიზარდა.
მეხუთე ადგილზე PJSC Novatek–ის სამეთვალყურეო საბჭოს თავმჯდომარე ლეონიდ მიხელსონია. ბიზნესმენმა რუსეთ-უკრაინის კონფლიქტის გამო $2,5 მლრდ დაკარგა. მისი ქონება $27.4-დან $24,9 მილიარდამდე შემცირდა.
$22 მილიარდით მეექვსე ადგილზე პრეზიდენტ პუტინთან დაახლოებული ოლიგარქი გენადი ტიმჩენკოა. მისი ქონება 7 დღეში $1,8 მილიარდით შემცირდა. აღსანიშნავია, რომ ტიმჩენკო ერთ-ერთი პირველი ბიზნესმენი იყო, რომელსაც ბრიტანეთმა სანქციები დაუწესა.
მეცხრე ადგილიდან მეშვიდეზე დაწინაურდა კომპანია USM-ის დამფუძნებელი ალიშერ უსმანოვი. ის 10 ყველაზე მიდიარ რუსს შორის მეორე ბიზნესმენია, ვისი ქონებაც გაიზარდა. უსმანოვის კაპიტალი $16. 8 მილიარდიდან $18,4 მილიარდამდე გაიზარდა.
მნიშვნელოვანი ფინანსური დანაკარგი აქვს Eurochem-ისა და SUEK-ის დირექტორთა საბჭოს წევრს ანდრეი მელნიჩენკოს. ბიზნესმენის ქონება $9.6 მილიარდით $17,9 მილაირდადმე შემცირდა. კონფლიქტამდე ბიზნესმენის ქონების ღირებულება $27.5 მილიარდს შეადგენდა.
Telegram-ის დამფუძნებელი პაველ დუროვი ერთადერთია, ვის ქონებაზეც რუსეთ-უკრაინის კონფლიქტს არ უმოქმედია. ბიზნესმენის ქონების ღირებულება $17.2 მილიარდს შეადგენს.
მეათე ადგილზე რუსეთის ფედერაციის სახელმწიფო დუმის ყოფილი დეპუტატი სულეიმან კერიმოვია. Forbes 55 წლის ბიზნესმენის ქონება $12 მილიარდად აფასებს.
აღსანიშნავია, რომ ათ ყველაზე მდიდარმა რუს ბიზნესმენთა სიაში აღარაა ჩუკოტკის ყოფილი გუბერნატორი, დუმის ყოფილი დეპუტატი და ლონდონური კლუბ „ჩელსის“ ასევე ყოფილი მფლობელი რომან აბრამოვიჩი. ბიზნესმენის ქონება $14,6 მილიარდიდან $14,5 მილიარდამდე შემცირდა.
ბაჩო ადამია
ომი
