დედაქალაქის მერია ქ. თბილისში, რუსთაველის გამზ. #6 (ს.კ.:01.15.05.064.010), საქართველოს პირველი რესპუბლიკის სახელობის ბაღის რეაბილიტაციის საპროექტო დოკუმენტაციის შედგენის მომსახურების სახელმწიფო შესყიდვას გეგმავს.
როგორც სატენდერი დოკუმენტაციაშია ნათქვამი, პროექტის ძირითადი მიზანია, საქართველოს პირველი რესპუბლიკის სახელობის ბაღისთვის შეიქმნას რეაბილიტაციის პროექტი მნიშვნელოვანი ჩარევების და გადაკეთებების გარეშე. გასათვალისწინებელია პარკისისტორიული იერსახის შენარჩუნება და შესაბამისი საპროექტო დოკუმენტაციის მომზადება; ტერიტორიის განვითარებისათვის საჭირო ტექნიკური პირობების შესაბამისი მშენებლობის ორგანიზაციის და რეგულირების საკითხების გადაწყვეტა; ტერიტორიის თემატური განვითარების გეგმების ინტეგრაცია სივრცით ტერიტორიული განვითარების ძირითად მიმართულებებთან და შესაბამისად ასახვა გენერალურ გეგმაში.
„არსებული ტერიტორიისთვის ჩატარდეს წინასაპროექტო კვლევა, რომელიც მნიშვნელოვანწილად განსაზღვრავს განვითარების პერსპექტივებს და პროექტირების ეტაპზე გათვალისწინებული იქნება მისი შედეგები და რეკომენდაციები; კვლევის ეტაპზე მომზადდეს სახელოვნებათმცოდნეო კვლევა, ტოპო რუკა და მასზე დაყრდნობით განხორციელდეს ტერიტორიის ფუნქციური ზონირება.
გაიმართოს საჯარო კონსულტაცია მოქალაქეთა ჩართულობის ფარგლებში. გამოიკვეთოს მაცხოვრებლების პრიორიტეტები (ტერიტორიის თემატური განვითარების),რომლებიც შეძლებისდაგვარად იქნება გათვალისწინებული მოცემული პროექტის შემუშავებისას.
კვლევა დამუშავდეს არქიტექტურულ-გეგმარებითი საპროექტო დოკუმენტაციის მომზადებისთვის საჭირო ყველა მოთხოვნისა და მონაცემის გათვალისწინებით, თანამედროვე საერთაშორისო და ეროვნული საუკეთესო პრაქტიკის შესაბამისად“- აღნიშნულია დოკუმენტაციაში.
შესყიდვის სავარაუდო ღირებულება 338983 ლარია. წინადადებების მიღება 08 აპრილს დაიწყება და 13-ში დასრულდება.