ფლანგვის დეტექტორმა პროპაგანდისტული მედია „პოსტ ტვ“-ის შესახებ კვლევა გამოაქვეყნა. კვლევის მიხედვით, ანტიდასავლურ პროპაგანდისტულ ტელევიზიას 2019-2022 წლებში 12 მილიონ ლარამდე შემოსავალი აქვს მიღებული. მის რეკლამის დამკვეთებში მთავრობის ადმინისტრაცია, თავდაცვის სამინისტრო და მოსკოვში რეგისტრირებული კომპანია Optium Media Buying limited-ია.
ფლანგვის დეტექტორი წერს, რომ 2022 წლის 19 აგვისტოს, სახელმწიფო უსაფრთხოების სამსახურის (სუს) ყოფილმა მაღალჩინოსანმა სოსო გოგაშვილმა განაცხადა, რომ ტელეკომპანია პოსტვ-ი სუს-ის სპეციალური დანაყოფია და მის შექმნაში თავადაც მონაწილეობდა.
POSTV 2017 წელს დაფუძნდა. კომპანიას 5 დამფუძნებელი ჰყავდა, რომლებიც წილებს თანაბრად ინაწილებდნენ - ნუგზარ რუხაძე, ზაზა შათირიშვილი, ზვიად ბლიაძე, შალვა რამიშვილი და შპს „სვოტ პროდაქშენი“.
2022 წლის ოქტომბერში კომპანიის წილების 52% ქართული ოცნების ყოფილმა დეპუტატმა და „ხალხის ძალას“ ერთ-ერთმა ლიდერმა ვიქტორ ჯაფარიძემ შეისყიდა. ნასყიდობის ხელშეკრულების თანახმად, 1%-ის ღირებულება 10,000 ლარს შეადგენდა, საერთო ჯამში კი 52% წილების შესასყიდად ვიქტორ ჯაფარიძემ 520,000 ლარი გადაიხადა.
არხს 3 მესაკუთრე ჰყავს: შალვა რამიშვილი (24%), თემურ ჭარელაშვილი (24%) და ვიქტორ ჯაფარიძე (52%). შესაბამისად, კომპანიაში ყველაზე მეტ წილს “ხალხის ძალის” ერთ-ერთი წევრი ვიქტორ ჯაფარიძე ფლობს.
„ხალხის ძალის“ ერთ-ერთმა ლიდერმა, სოზარ სუბარმა განაცხადა, რომ ჯაფარიძის მიერ ტელევიზიის საკონტროლო პაკეტის შესყიდვა ხელს შეუწყობთ „სათქმელის საზოგადოებამდე კიდევ უფრო ფართოდ“ მიტანაში. POSTV-ის ერთ-ერთმა მფლობელმა, შალვა რამიშვილმა კი მოგვიანებით ტელევიზიის სახელით სოციალურ ქსელში გამოაქვეყნა განცხადება, სადაც წერია, რომ ტელევიზიამ მიიღო გადაწყვეტილება, ღიად დაუჭიროს მხარი „ხალხის ძალას“: „არხი დღეიდან ხდება მოძრაობა „ხალხის ძალის“ მედიაპლატფორმა“, – აცხადებს შალვა რამიშვილი.
„მაუწყებლობამ პირველი შემოსავალი 2019 წლის, მე-4 კვარტალში მიიღო. ამ დროიდან 2022 წლის ბოლომდე არხს ჯამში 11,990,859 ლარის შემოსავალი აქვს მიღებული.
შემოსავლის უდიდესი ნაწილი რეკლამებიდან მიღებული თანხებია, თუმცა მაუწყებლობის მფლობელის შემოწირულებებიც ფიქსირდება. მაგალითად, მაუწყებლობის მფლობელებმა არხს 100,000 ლარი შესწირეს 2020 წელს, ხოლო 2021 წელს - 295,970 ლარი. რაც შეეხება რეკლამიდან მიღებულ შემოსავალს, პოსტვ-იმ რეკლამირებიდან 2019-2022 წლებში 9,712,400 ლარი მიიღო.
რეკლამირებიდან მიღებულ თანხებს წლიდან-წლამდე იზრდება. მაგალითად 2020 წელს რეკლამირების შედეგად პოსტვ-მ 1,403,707 ლარი მიიღო, 2021 წელს - 4,046,911ლარი, ხოლო 2022 წელს 4,261,782 ლარი.
კომპანიებს შორის, რომლებიც პოსტვ-ის რეკლამის განსათავსებლად მიმართავენ, არიან საჯარო დაწესებულებებიც, მათ შორის საქართველოს თავდაცვის სამინისტრო, საქართველოს მთავრობის ადმინისტრაცია.
აღსანიშნავია, რომ პოსტვ-ის სარეკლამო მომსახურებას უწევენ როგორც ადგილობრივი ისე უცხოური კომპანიები. 2022 წელს, არხზე რეკლამები განათავსა კომპანია Optimum Media Buying Limited-მა. კომპანია Optium Media Buying limited რეგისტრირებულია მოსკოვში. აღნიშნულმა კომპანიამ 3-ჯერ გამოიყენა POSTV რეკლამირებისთვის, ხოლო რეკლამირებაზე დახარჯულმა თანხამ თითოეულ შემთხვევაში 7,000-დან 50,000-მდე ლარი შეადგინა. აღნიშნული კომპანია სარეკლამო მომსახურებაში თანხას ასევე სხვა სამაუწყებლო არხებსაც უხდის, მაგალითად ტელე-იმედს, GDS TV-ის, მედია ჰოლდინგს და მთავარი არხს“, - წერს ფლანგვის დეტექტორი.