პოსტ ტვ-ის თანამშრომელი და „ხალხის ძალის“ წევრი ნიკოლოზ ქობულაძე ცხოველთა მონიტორინგის სამსახურსაც ხელმძღვანელობდა და 4 წელში, ჯამში, მისმა ხელფასმა 246 000 ლარი შეადგინა. ინფორმაციას ამის შესახებ „ფლანგვის დეტექტორი“ ავრცელებს.
არასამთავრობო ორგანიზაციის მიერ ჩატარებული კვლევის თანახმად, თავდაპირველად, ნიკოლოზ ქობულაძე თბილისის ცხოველთა მონიტორინგის სამსახურში დირექტორის მრჩევლად 2018 წლის მარტში დაინიშნა. ერთი თვის მუშაობის შემდეგ, 2019 წლის მარტის ბოლოდან იგი სააგენტოს დირექტორის მოადგილე გახდა. 2020 წლის აგვისტოში ის სააგენტოს დირექტორის მოვალეობის შემსრულებლად დაინიშნა, რა თანამდებობასაც 2022 წლის 14 დეკემბრამდე იკავებდა.
„2018 წელს მისმა შემოსავალმა ცხოველთა მონიტორინგის სამსახურში 41,000 ლარი შეადგინა, 2019 წელს 51,200 ლარი, ხოლო 2020 წელს 47,700 ლარი. საერთო ჯამში, ამ სამი წლის განმავლობაში მან ბიუჯეტიდან ხელფასის სახით 139,800 ლარი მიიღო. 2021 წლის იანვრიდან 2022 წლის ნოემბრის ჩათვლით მისმა ხელფასმა დირექტორის რანგში 106,300 ლარი შეადგინა.
მისი, როგორც დირექტორის თავდაპირველი თვიური ხელფასი 4,500 ლარი იყო, შემდგომში 5,600 ლარი, ხოლო 2022 წლიდან მისი თვიური ხელფასი 6,160 ლარი გახდა, საიდანაც 4,829 ლარს ხელზე იღებდა.
2019 წლიდან ის პოსტ ტვ ანალიტიკისთვის იწერს ყოველკვირეულ ვიდეო ბლოგებს, რომელიც ავრცელებს სამთავრობო პროპაგანდას და ანტიდასავლურ განწყობებს აღვივებს, ამავე დროს აღსანიშნავია ის ფაქტიც, რომ 2022 წლის ოქტომბერში ნიკა ქობულაძე, პოსტ ტვ-ის სხვა წამყვანებთან ერთად შეურთდა ე.წ „ხალხის ძალას““ - ნათქვამია ფლანგვის დეტექტორის მიერ გავრცელებულ ინფორმაციაში.
ცნობისთვის, ცხოველთა მონიტორინგის სამსახურის საშუალო წლიური ბიუჯეტი 4 მილიონი ლარია და ამ თანხის ნახევარი ხელფასებში იხარჯება.