საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინასაპარლამენტო არჩევნების დროს, ფრაქციამ „ქართული ოცნება-დემოკრატიული საქართველო“ მოსახლეობას სოციალური კეთილდღეობას და სწრაფ განვითარებას დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა,  ფასების საერთო დონე კი რეკორდულად იზრდება. „კომერსანტი“ დაინტერესდა ამ დროის განმავლობაში რა გააკეთეს მმართველი პარტიის დეპუტატებმა მთავარი დანაპირების - „კეთილდღეობის და სწრაფი განვითარების“ შესასრულებლად, რის გამოც ოთხი წლის წინ ამომრჩევლებს ხმას სთხოვდნენ. როგორ აფასებენ საკუთარ სიტყვას და საქმეს დეპუტატების სავარძლებიდან და რას ეუბნებიან ამომრჩევლებს.

„კომერსანტი“ აგრძელებს სტატიების ციკლს, სახელწოდებით — რა წვლილი შეიტანა ქართველი ხალხის კეთილდღეობასა და სწრაფ განვითარებაში თითოეულმა დეპუტატმა ამ ოთხი წლის განმავლობაში. ამჯერად „კომერსანტი“ „ქართული ოცნების“ პარტიიდან გასულ დეპუტატებს დაუკავშირდა.

კახა ოქრიაშვილი, რომელმაც ცოტა ხნის წინ ცეზარ ჩოჩელთან ერთად პარტია დააარსა ცალსახად აცხადეებს, რომ მმართველი გუნდის დანაპირები , რისთვისაც „ქართულ ოცნებას“ საკმარისი დრო ჰქონდა, ვერ შესრულდა, ეკონომიკური წინსვლის მაჩვენებელი გაუარესდა, ხოლო  ბიზნესგარემო არ არის იმედისმომცემი.

„მე ვფიქრობ, რომ დანაპირები ვერ შესრულდა. რასაც ჰპირდბოდა „ოცნება“ საზოგადოებას, ფაქტობრივად არაფერი შესრულდა. მე ამ გუნდის წევრი არ ვიყავი, ვიყავი მოკავშირე.  ერთი თვის წინ, მე და ცეზარ ჩოჩლმა პარტია დავაარსეთ, მანამდე უპარტიო გახლდით. „ქართულ ოცნებას“ ჰქონდა საკმარისი დრო, რომ ქვეყანა წინ წაეყვანა. 2004 წლიდან  2012 წლამდე ვაკრიტიკებდი იმ მთავრობას მართლმსაჯულების მახინჯი ფორმების გამო. არც მაშინ იყო ბიზნეს გარემო კარგი და არც ახლა, მაგრამ მაშინ სხვა პრობლემები იყო, ახლა სხვა პრობლემებია. მაშინ ეკონომიკური ზრდა მაინც იყო, ახლა არის 2-4 პროცენტი, რაც დამღუპელია ჩვენი ქვეყნისთვის. ჩვენ გვინდა ძალიან სწრფი, ნახტომისებური ეკონომიკური ზრდა და ამასთანავე კარგი ბიზნეს გარემო, კანონის უზენაესობა, სასამართლოს გამართული მუშაობა. სამართლიანი ინსტიტუტები უნდა იყოს ქვეყანაში და ეს არის ყველაფრის საწინდარი. იცით რამდენი თანხებია მთელს მსოფლიოში, რის მოზიდვის სურვილიც გვაქვს, მაგრამ 80 პროცენტი ცოდნაა და 20 პროცენტია დაფნანსება. ადამიანური კაპიტალის ნაკლებობა გვაქვს, ეს არის პრობლემა,“ - განმარტავს კახა ოქრიაშვილი.