საქართველოს პრეზიდენტმა სალომე ზურაბიშვილმა პარლამენტში ქართული ოცნების წარმომადგენლებს მიმართა და განაცხადა, რომ ხელისუფლებამ გადაუხვია ხალხის ნებას:

„არ შემიძლია არ შეგახსენოთ, სად იდექით გუშინ, როდესაც ხალხის მიერ მინიჭებული მანდატის შესრულებას შეუდექით. თქვენ იყავით ხელისუფლება, რომელმაც აღასრულა ხალხის ნება, დაამარცხა ავტორიტარიზმი და დააბრუნა დემოკრატია ქვეყანაში. თქვენ იყავით ხელისუფლება, რომელმაც არჩევნებით, მშვიდობიანად და რევანშიზმის გარეშე გადაიბარეთ ხელისუფლება, შეუდექით სამართლიანობის აღდგენას, ყოფილ პრეზიდენტთან კოჰაბიტაციის, ქვეყნის სახის, დემოკრატიის და რეპუტაციის დასაცავად. თქვენმა ხელისუფლებამ თავი მოუყარა თითქმის ყველა ოპოზიციას და შექმნა მრავალპარტიული კოალიცია, გაათავისუფლა ბიზნესი და მედიას დაუბრუნა პლურალიზმი და სიტყვის თავისუფლება. საგარეო პოლიტიკაში გაამყარა ქვეყნის ევროატლანტიკური კურსი. 2012 წელს ბიძინა ივანიშვილმა მიიღო პროევროპული გადაწყვეტილება და პირველი ვიზიტი ბრიუსელში განახორციელა 2014 წელს ასოცირებას მოეწერა ხელი, 2016 წელს კი ვიზალიბერალიზაცია, 2018 წელს კონსტიტუციაში ჩაიწერა პროევროპული გზის მხარდაჭერა და ამავე წელს ჩემი კანდიდატურის მხარდაჭერაც ამის ნაწილი იყო. 2019 წელს ჩატარდა ბათუმის საერთაშორისო კონფერენცია.

2021 წელს თქვენ იყავით ხელისუფლება, რომელიც ხალხს დაჰპირდა, რომ 2024 წელს ევროკავშირში განაცხადს გააკეთებდა. თქვენ ამას ერთხმად ხალხის არჩევანს უწოდებდით, ამიტომ ახლა არ შემიძლია არ გითხრათ და გკითხოთ სად დგახართ და რატომ, რატომ ჩამოშორდით ხალხის ნებას და მისგან მიღებულ მანდატს, რომელსაც აქამდე პირნათლად ასრულებდით. დღეს თქვენ ხართ ხელისუფლება რომელმაც ნელ-ნელა დაიწყო ფერისცვალება, სახელმწიფო ინსტიტუტების  გაძლიერების ნაცვლად ძლიერდება ერთპარტიული მმართველობა და მისი გავლენები, დაჩქარებულ რეჟიმში მიღებული კანონები ემსახურება არა ქვეყნის დემოკრატიის გაძლიერებას, არამედ ძალაუფლების გახანგრძლივებას. სასამართლო რეფორმა ჩიხშია, თქვენმა ხელისუფლებამ არ გაარღვია ის მოჯადოებული წრე, რომელშიც ერთი და იგივე ადამიანები ტრიალებენ.

ქართული ოცნებიდან წასვლა დაიწყეს განსხვავებული აზრის ადამიანებმა. თქვენს რიგებში აღარ ისმის არც ერთი ოდნავ განსხვავებული აზრი, რადგან ეს ავტომატურად მანდატის დატოვებას ნიშნავს. დაიწყო პარტიის გავლენის გაძლიერება მთავრობასა და პარლამენტზე. პარტია გადაიქცა გადაწყვეტილებების მიღების სივრცედ. პარტიის თავმჯდომარე საკუთარ პოზიციას წინასწარ აცხადებს ყველა პოლიტიკურ საკითხზე. ბუნდოვანი გახდა გადაწყვეტილებების მიღების პროცესი, რომ არაფერი ვთქვა დისკუსიაზე, ღია დისკუსიაზე. თქვენ ხართ ხელისუფლება, რომელიც  ბოლო წლებში გადადგმული გაუგებარი ნაბიჯებით უპირისპირდება ქვეყნის საგარეო მიზანს და ხალხის მანდატს,“- განაცხადა სალომე ზურაბიშვილმა.