საქართველოს ქონების ეროვნული სააგენტო არ ეთანხმება ექსპერტების აკაკი ჩარგეიშვილისა და რამაზ გერლიანის მოსაზრებას, რომლებიც „კომერსანტთან“ აცხადებდნენ, რომ მთავრობას პრივატიზაციის პროცესი ჩაუვარდა. 

უწყებაში აცხადებენ, რომ სახელმწიფოს საკუთრებაში არსებული რესურსების  პროაქტიული გაყიდვების  და ქვეყანაში მეტი ინვესტიციის მოსაზიდად, ეკონომიკის სამინისტრომ 2019 წელს ბიზნეს სექტორს მასშტაბური საპრივატიზებო პროგრამა „100 საინვესტიციო შეთავაზება ბიზნესს“ წარუდგინა. პროგრამის მეშვეობით ნებისმიერ დაინტერესებულ პირს ბიუროკრატიული ბარიერების გარეშე უკვე გამოცხადებულ ელექტრონულ აუქციონში მონაწილეობის უფლება მიეცა. პროექტის ფარგლებში 2019 წლიდან დღემდე ჯამში 315 მლნ ლარზე მეტი ღირებულების 403 ობიექტი გასხვისდა.

2019-2020 წლებში პანდემიის მიუხედავად, სააგენტომ გადაჭარბებით შეასრულა საპრივატიზებო გეგმა და  პროექტ „100 საინვესტიციო შეთავაზება ბიზნესს“ ფარგლებში ელექტრონულ აუქციონზე 116 უძრავი ქონება გაყიდა, რომელთა საწყისი ღირებულება შეადგენდა 67 398 251 ლარს, ხოლო საპრივატიზებო თანხამ 84 447 751 ლარი შეადგინა. გაყიდვების სტიმულირების მიზნით, ამავე პერიოდში ამოქმედდა ფასდაკლების მექანიზმი, რაც 25% დან 50%-მდე ფასდაკლებას ითვალისწინებდა.

2021 წელს ქვეყნის წინაშე არსებული   ეკონომიკური გამოწვევების საპასუხოდ, დაჩქარებული პრივატიზაციის ფარგლებში, პროგრამა „100 საინვესტიციო შეთავაზება ბიზნესს“ კიდევ უფრო გაფართოვდა და სახელმწიფო ქონების ეროვნულმა სააგენტომ ბიზნეს სექტორს არასასოფლო-სამეურნეო ქონებასთან ერთად სასოფლო-სამეურნეო დანიშნულების მიწის ნაკვეთები და სახელმწიფოს მფლობელობაში არსებული სხვადასხვა პროფილის საწარმოები შეთავაზა. შედეგად, მიმდინარე წელს, დღეის მდგომარეობით ჯამში 230,909,439  ლარის ღირებულების 287 ობიექტი გასხვისდა. აქედან 3 253 539 ლარის ღირებულების 6 სახელმწიფო საწარმო და 34 005 500 ლარის ღირებულების 91 სასოფლო-სამეურნეო დანიშნულების მიწის ნაკვეთი.

პროექტი „100 საინვესტიციო შეთავაზება ბიზნესს“ ფარგლებში 2019 წლიდან დღემდე ჯამში 315 მლნ ლარზე მეტი ღირებულების 403 ობიექტი გასხვისდა, რაც მეტყველებს პროექტის წარმატებით მიმდინარეობაზე. სააგენტო აქტიურად აგრძელებს მუშაობას სხვადასხვა საპრივატიზებო პაკეტების შემუშავებაზე და მომავალში ბიზნეს სექტორს კიდევ უფრო მეტ საინვესტიციოდ მიმზიდველ ობიექტებს შეთავაზებს. - აცხადებენ ქონების ეროვნულ სააგენტოში.