ფონდ ,,ღია საზოგადოება-საქართველოს“ ევროინტეგრაციის პროგრამის მენეჯერის ვანო ჩხიკვაძის შეფასებით, რუსეთის აგრესიის შესაჩერებლად ბევრად ქმედითი ნაბიჯებია გადასადგამი, ვიდრე აქამდე ხდებოდა. კერძოდ, ის თვლის, რომ უაღრესად მნიშვნელოვანია, რამდენად არის ევროკავშირში ისეთი ლიდერი, ვინც ამ კრიზისიდან გამოსავალს საკუთარ თავზე აიღებს და რუსული აგრესიის შეკავებას შეძლებს.
,,ქალაქების აღება და კონტროლი არ არის მარტივი საქმე, აქედან გამომდინარე, ეს მოკლევადიანი ომი არ იქნება. თუკი რუსეთის ქმედება ემსახურება საბჭოთა კავშირის აღდგენას, ამ კავშირში შედიან ბალტიისპირეთის ქვეყნებიც, ამიტომ ამ ჩანაფიქრის დაშვებაც კი ნიშნავს, რომ რუსეთი ნატოსკენ იწევს. ეს კი პრაქტიკულად მესამე ომის დასაწყისის ტოლფასია. ეს მნიშვნელოვანი დეტალია. ჯერჯერობით საუბარია სანქციებზე, რომელიც ბევრად უფრო წინგადადგმული ნაბიჯია, ვიდრე აქამდე ხდებოდა და რეალურად პასუხობს რუსეთის ქმედებებს. მიუხედავად ამისა, ეს არ არის საკმარისი, აუცილებელია ისეთი ლიდერი, ვინც რუსეთის აგრესიის შეკავებას შეძლებს. ევროკავშირის უსაფრთხოებას აქვს სერიოზული რისკი და ეს ომი მისთვის ყველაზე დიდი გამოწვევაა. ამიტომ რეაქცია უნდა იყოს მწვავე, რადგან შეიძლება რუსეთი უკრაინაზე აღარ გაჩერდეს და უფრო წინ წავიდეს, არაფერია გამორიცხული“, - ამბობს ვანო ჩხიკვაძე ,,კომერსანტთან“.
რაც შეეხება საქართველოს პოზიციას, მისი თქმით, ამ ეტაპზე მას მნიშვნელოვანი ფუნქცია არ აკისრია გარდა იმისა, რომ მიიღოს უკრაინიდან ლტოლვილი მოქალაქეები, რომლებიც დიდ განსაცდელში არიან.
,,წინა პლანზე მნიშვნელოვანია ისეთი სახელმწიფოების როლი, როგორიც აშშ და ევროკავშირის ქვეყნებია. რეალურად მათ უნდა მიიღონ ისეთი გადაწყვეტილება, რაც მტკივნეული იქნება რუსეთისთვის და შემდეგი ნაბიჯის გადადგმას დააფიქრებს. ჩვენს შემთხვევაში ეს არის ვერბალურად, გარკვეული სოლიდარობის გამოცხადება. თუკი რომელიმე ლტოლვილი გადაწყვეტს, რომ საქართველოში ჩამოვიდეს, გეოგრაფიული მდგომარეობის მიუხედავად, ჩვენი ქვეყანა მზად უნდა იყოს, შეიფაროს ლტოლოვილები“, - დასძენს ვანო ჩხიკვაძე.
შეგახსენებთ, რომ საქართველოში მყოფი უკრაინელი ტურისტებისა და მათი მასპინძელი კერძო სექტორისთვის ამუშავებულია საქართველოს ტურიზმის ეროვნული ადმინისტრაციის უფასო ცხელი ხაზიც. 0 800 800 909 ფუნქციონირებს 24/7 განმავლობაში და უკრაინის მოქალაქეებს მოუწოდებს ნებისმიერი საჭიროების შემთხვევაში დაუკავშირდნენ დახმარებისთვის.
მარი ჩიტაია