სახელმწიფო აუდიტმა სამსახურმა შინაგან საქმეთა სამინისტროს სასაზღვრო პოლიციის 2019-2020 წლების აქტივების მართვისა და სახელმწიფო შესყიდვების შესაბამისობის აუდიტი ჩაატარა. შედეგები 24 მარტს გამოქვეყნდა.
უწყების ინფორმაციით, სასაზღვრო პოლიციას თავისი ფუნქციების შესასრულებლად გააჩნია მნიშვნელოვანი ოდენობის და ღირებულების აქტივები, რომლებიც განთავსებულია ქვეყნის მთელ ტერიტორიაზე (ძირითადად, საზღვრებზე), მათ შორის რთულად მისადგომ ადგილებში, რის გამოც პრობლემურია მათი მართვა და დაცულობაზე სრულყოფილი კონტროლი. აღნიშნული ქონების მართვაში დაფიქსირდა სხვადასხვა სახის დარღვევა-ნაკლოვანება. კერძოდ:
უძრავი ქონება
ინფრასტრუქტურის განვითარების სტრატეგიული გეგმის არარსებობა, ამორტიზებული და გამოუყენებელი შენობა-ნაგებობები, საცხოვრებელი ბინების მართვის ნაკლოვანებები, არარეგისტრირებული უძრავი ქონება.
საფრენი
აპარატები
დასაცავი ტერიტორიის საჰაერო მონიტორინგის ნაკლოვანება, საფრენი აპარატების საექსპლუატაციო მზადყოფნის ნაკლოვანებები, საგანგებო სიტუაციებში ჩართულობისა და ლიტერული ფრენების კონტროლის ნაკლოვანებები
მცურავი საშუალებები
მცურავი საშუალებების საექსპლუატაციო მზადყოფნის ნაკლოვანებები, მცურავი საშუალებების მიერ საწვავ-საპოხი მასალების მოხმარების ნაკლოვანებები.
სხვა სპეციფიკური ქონება
ცეცხლსასროლი იარაღის და საბრძოლო მასალების მართვის ნაკლოვანებები, კინოლოგიის მიმართულებით არსებული ნაკლოვანებები.
ავტოპარკის
მართვა
ავტოპარკის ოპტიმიზაციის პროცესში არსებული ნაკლოვანებები, საწვავის არამიზნობრივი ხარჯვის პრევენციული მექანიზმების ნაკლოვანებები.
მცირეფასიანი ინვენტარი, სასაქონლო მატერიალური მარაგები და სხვა აქტივები
გამოუყენებელი მცირეფასიანი ინვენტარის და სასაქონლო მატერიალური მარაგების ჩამოწერასთან დაკავშირებული პრობლემები, კვების პროდუქტების ხარჯვის ნაკლოვანებები.
აქტივების ინვენტარიზაცია
სტრუქტურულ ქვედანაყოფებში ჩატარებული ინვენტარიზაციის შედეგების გადაუმოწმებლობა. ინვენტარიზაციის ჩატარება არაოფიციალური სამუშაო ჯგუფების მიერ, უსარგებლო აქტივების გამოვლენაში არსებული ნაკლოვანებები, დანაკლისის ანაზღაურების პრობლემა.
სახელმწიფო შესყიდვები
სახელმწიფო შესყიდვების განხორციელების პროცესში გამოვლინდა ხარვეზები და ნაკლოვანებები, რომლებიც საბიუჯეტო სახსრების ნაკლებობასთან ერთად გამოწვეულია შემდეგი ფაქტორებით: შესყიდვების არასწორი დაგეგმვა, შესასყიდი საქონლის/მომსახურების პრიორიტეტულობის დაუცველობა, შესყიდვის პროცედურების დაგვიანებით დაწყება და სხვა ნაკლოვანებები.
სახელმწიფო აუდიტის მიერ გამოქვეყნებულ შესაბამისობის აუდიტის ანგარიშს დღეს სასაზღვრო პოლიციაში ვრცელი განცხადებით გამოეხმაურნენ. უწყებაში აცხადებენ, რომ აუდიტის ანგარიში შეეხება 2019-2020 წლების პერიოდს და არ მოიცავს ინფორმაციას შემდგომ წლებში სასაზღვრო პოლიციაში განხორციელებული მნიშვნელოვანი რეფორმებისა და პროგრესის შესახებ. აუდიტის ჩატარების მეთოდოლოგიიდან გამომდინარე, გამოქვეყნებულ დოკუმენტში ასევე არ არის ასახული მათ მიერ გაცემული რეკომენდაციების შესრულების შესახებ ინფორმაცია.
„შინაგან საქმეთა სამინისტროს სასაზღვრო პოლიცია ყოველდღიურ რეჟიმში, არაერთი მიმართულებით ახორციელებს მნიშვნელოვან რეფორმებს და ნერგავს თანამედროვე სიახლეებს, რომლებიც საზღვრის დაცვის გაძლიერებას უწყობს ხელს.
2022 წელს დამტკიცდა ქვეყნის განვითარების 10-წლიანი სამოქმედო სტრატეგია და შესაბამისი სამოქმედო გეგმა, რომელშიც წლების მიხედვით გაწერილია თითოეული სამინისტროს, მათ შორის შინაგან საქმეთა სამინისტროს მიერ განსახორციელებელი რეფორმები და მომდევნო წლებში შესასრულებელი სტრატეგიული ამოცანები. ამავე სტრატეგიაშია ასახული სასაზღვრო პოლიციის განვითარების გეგმაც, რასაც თანმიმდევრულად ვახორციელებთ.
ამასთანავე, საქართველოს მთავრობამ უკვე დაამტკიცა 2023-2027 წლების სახელმწიფო საზღვრის ინტეგრირებული მართვის სტრატეგია.
დღეის მდგომარეობით, ანგარიშში არსებული პრობლემები მნიშვნელოვნად გამოსწორებულია,“- აღნიშნულია უწყების განცხადებაში.