ბოლო დღეების ტენდენციას, რომ რუსეთის მოქალაქეები უსაფრთხოების მიზნით საქართველოში ხანგრძლივი ვადით ცდილობენ დარჩენას, იურისტი აკაკი ჩარგეიშვილი აფასებს. მისი თქმით, მიმდინარე პერიოდში საქართველოში  დასვენების სურვილით არც ერთი მოქალაქე არ შემოვა და ყველა შემთხვევაში ამას შეიძლება პირადი თავდაცვის ხასიათი ჰქონდეს, ანუ ადამიანები უსაფრთხოების მიზნით ცდილობდნენ ჩვენ ქვეყანაში დარჩენას.

ასეთ შემთხვევაში, როგორც იურისტი განმარტავს, მნიშვნელოვანია, პირს მიეცეს ლტოლვილის სტატუსი და საკითხი კანონმდებლობის დონეზე დარეგულირდეს.

,,ახლა ვინც რუსეთიდან შემოდის, უნდა ჩავთვალოთ, რომ პუტინის რეჟიმს გამოექცა და თავშესაფრის მიღება სურს. გვინდა თუ არა, ამ ტალღას რუსეთიდან ვერ ავირიდებთ.  ამიტომ ჩვენ ამას მომზადებული უნდა შევხვდეთ, ოფიციალური სახე მივცეთ ამ ყველაფერს და გეგმაზომიერი ნაბიჯი გადაიდგას. ვინმე თუკი შემოდის ქვეყანაში, ე.ი. რუსულ რეჟიმს არ აღიარებს. გარდა ამისა, ასეთ პირს უნდა  მოვაწერინოთ სპეციალურ დოკუმენტზე ხელი, რომ პუტინი არის დამპყრობელი, არ აღიარებს რუსეთის რეჟიმს და ამიტომ ითხოვს თავშესაფარს. ლტოლვილის სტატუსით თუ მივიღებთ თავშესაფრის მაძიებლებს, საქართველო გაეროს მისიის ეგიდით გვერდში დაუდგება ამ ადამიანებს და პრობლემის მოგვარებაში დაეხმარება კიდეც,  რის ვალდებულებაც ქვეყანას გაეროს რეზოლუციის საფუძველზე აქვს ნაკისრი.  ამიერიდან უფრო უნდა დარეგულირდეს ეს საკითხი და სპეციალური კანონი მიიღოს მთავრობამ, თუკი  ლტოლვილის სტატუსის მაძიებელი ადამიანები გამოჩნდებიან. პირდაპირ არავინ აძლევს ამ სტატუსს, მაძიებლის რეჟიმში იქნებიან და მათზე სამართალწარმოება ინდივიდუალურად დაიწყება. რაციონალური მიდგომით ეს საკითხი მოგვარდება“, - ამბობს ჩარგეიშვილი ,,კომერსანტთან“ და  დასძენს, რომ საქართველოს არჩევანი - ლტოლვილის სტატუსით მიიღოს საკუთარ ქვეყანაში რუსეთის მოქალაქეები ან მოახდინოს მათი დეპორტაცია, რაც რამდენიმე წლის წინ აგრესორმა ქვეყანამ ქართველების მიმართ განახორციელა.

,,ამ ეტაპზე თუ ვინმე შემოდის რუსეთიდან, ემოციური ტალღაა, ამიტომ ჩვენი მზაობა რეგლამენტაციური უნდა იყოს.  შესაბამისად, თუ პირს ექნება ლტოლვილის სტატუსი, მას არ შეეძლება რამე მიისაკუთროს და არც ქონების დაკარგვის საფრთხე იქნება რეალური. სასოფლო-სამეურნეო საკითხი პრევენცირებულია, რაც შეეხება დანარჩენ ნაწილში - უცხო მოქალაქის მიერ ბინის თუ არასასოფლო მიწის შეძენასთან დაკავშირებით პრევენცია არ გვაქვს. იგივე ეხება აქციებს და წილებს.  რუსეთის მოქალაქეს, რომელიც შემოვა საქართველოში, უფლება აქვს, რომ ბინადრობის და სავიზო რეჟიმის საფუძველზე 1 წელი იმყოფებოდეს საქართველოში ყოველგვარი ნებართვის გარეშე. თუკი ახლა  შემოდის  ვინმე, უნდა ვიცოდეთ, რომ გამოექცა პუტინის რეჟიმს, რაც ნიშნავს, რომ ის არ აღიარებს დღევანდელი რუსეთის ხელისუფლების მისწრაფებას, თავის ქვეყანაში ემუქრება საფრთხე და თავიდან არიდების მიზნით შემოდის მიმღებ ქვეყანაში, ანუ საქართველოში. არავინ არაფერს გვაძალებს,  შეგვიძლია რუსების ქვეყნიდან გაძევება ისევე, როგორც რამდენიმე წლის წინ ქართველების მიმართ განახორციელეს, ამის არანაირი პრობლემა არ არის“, - ამბობს აკაკი ჩარგეიშვილი ,,კომერსანტთან“.