ხელოვნების სასახლიდან პრეზიდენტის ადმინისტრაციაში დროებით გადატანილი ნახატებიდან ერთ-ერთი გახეულია. ამის შესახებ მედიასთან კულტურის სამინისტროს გენინსპექციის წარმომადგენელმა განაცხადა. პრეზიდენტის ადმინისტრაციაში აცხადებენ, რომ მათ არ იციან როდის მიიღო ნახატმა დაზიანება, ვინაიდან ნამუშევრების მათთან ტრანსპორტირება ამერიკიდან მოხდა. პრეზიდენტის ადმინისტრაციაში ამბობენ, რომ ატეხილი აჟიოტაჟი პოლიტიკურია, რაც შეეხება ვადებს, მათი თქმით, ვადები დარღვეული არაა და ნახატები პრეზიდენტის სასახლეში სალომე ზურაბიშვილის პრეზიდენტობის ვადის ამოწურვამდე უნდა დარჩენილიყო.
„სვიმონ დადიანის ნამუშევრები პრეზიდენტის ინიციატივითა და შუამდგომლობით, პრეზიდენტის ერთ-ერთმა უახლოესმა ოჯახმა საქართველოს გადმოსცა საჩუქრად. ამ ნამუშევრების ნაწილი ექსპონირებული იყო ჩვენ სასახლეში. ვფიქრობ, ვადები ყველანაირად დაცული იყო და არანაირი დარღვევა არ ყოფილა. რაც შეეხება დაზიანებას, ნამუშევრებმა საქართველომდე ძალიან დიდი გზა გაიარა. ვერ დგინდება როდის იქნა მიყენებული, ჩვენთან თუ ზოგადად დაზიანებული მოვიდა ჩვენს სასახლეში. ნებისმიერი ფაქტი, რომელიც უკავშირდება პრეზიდენტს და წარმოადგენს ან თავდასხმას, ამ მცდელობას პრეზიდენტის ინსტიტუტზე თავდასხმის, რა თქმა უნდა, არის პოლიტიკური,“ - განაცხადა პრეზიდენტის მრჩეველმა განათლების, კულტურისა და მეცნიერების საკითხებში კონსტანტინე ნაცვლიშვილმა.
საქართველოს პრეზიდენტი სალომე ზურაბიშვილი მხატვარ სანდრო სულაბერიძს საქმეს გამოეხმაურა და განაცხადა, რომ ეს სხვა ეპოქას გვახსენებს.
„ხელოვნება ცოცხალი და დამოუკიდებელია“ – ასეთი წარწერა დატოვა მხატვარმა სანდრო სულაბერიძემ ეროვნულ გალერეაში, სადაც 4 თებერვალს ჯგუფური გამოფენა გაიხსნა. მხატვარმა წარწერა ავტოპორტრეტის ნაცვლად გააკეთა. სანდრო სულაბერიძის მიერ კედელზე წარწერის გაკეთებასთან დაკავშირებით გამოძიება სისხლის სამართლის კოდექსს 177-ე მუხლით დაიწყო, რაც ქურდობას გულისხმობს.