ევროკომისიის რეკომენდაციების მოლოდინში ბევრ შეფასებას ვისმენთ, მით უმეტეს იმ წინასწარი ცნობების ფონზე, რომელიც „რადიო თავისუფლებამ“ ევროკავშირის დედაქალაქიდან მოგვაწოდა. ვრცელდება ინფორმაცია, რომ მოლდოვა და უკრაინა მიიღებს ევროკავშირისი წევრობის კანდიდატის სტატუსს, ხოლო საქართველო დათქმებს და შემდეგ სტატუსს.

„კომერსანტის დილის“ ეთერში დიპლომატმა, საგარეო საქმეთა ყოფილმა მინისტრმა გიგი გიგიაძემ ამ მოლოდინებზე და წინასწარ ინფორმაციებზე ისაუბრა.

„კანდიდატის სტატუსთან დაკავშირებით ორი შესაძლებლობაა კანდიდატი და პერსპექტიული კანდიდატი, არასასურველი დინამიკა იქნება თუ ასოცირების ტრიოს დააცალკევებენ და მოლდოვას და უკრაინას მისცემენ უფრო მეტს ვიდრე საქართველოს. წინაპირობები იქნება როგორც ერთისთვის ასევე მეორისთვის, ეს შეიძლება იყოს შარლ მიშელის დოკუმენტიდან სასამართლო რეფორმა, მედია თავისუფლების უზრუნველყოფა და სხვა. კანდიდატები უკვე იწყებენ მოლაპარაკებებს ევროკავშირში გაწევრიანებაზე ხოლო პოტენციურ კანდიდატებს ეძლევათ წინაპირობა, რომ ისინი მიღებენ უფლებას მაშინ, როდესაც ისინი ამისთვის მზად იქნებიან. ეს ორი საფეხური თითქოს ერთად არის, თუმცა ერთმანეთისგან ძალიან შორსაა“, - აღნიშნა გიგი გიგიაძემ.

„დღეს ევროკავშირის კანდიდატი ქვეყნის სტატუსი აქვს  5  ქვეყანას,  ესენია ალბანეთი  ჩრდილოეთ მაკედონიის  რესპუბლიკა,  სერბეთი,  მონტენეგრო და  თურქეთი,  სხვადასხვა  რაოდენობით წლებია  უკვე  ამ  სტატუსის  პირობებში იმყოფებიან. თუმცა, ამ პერიოდში ეს ქვეყნები  იღებენ  უდიდეს  ფინანსურ  დახმარებას,  2021 წლიდან 2027 წლამდე  მარტო  კანდიდატი  ქვეყნებისთვის  გამოყოფილია 14 მილიარდი  ევრო,  ეს  ეხება  სხვადასხვა სფეროებს, მათ  შორის  ეს  ვრცელდება  სამართლებრივ  სექტორზე, რაც სამართლებრივი სექტორის ევროკავშირთან სინქრონიზაციას გულისხმობს. გარდა ამისა ეს  გულისხმობს სოციალური  საკითხების  მაქსიმალური გამოსწორებას,  ეკონომიკური საკითხების  განხორციელებას და  ა.შ. რაც  ჩვენთვის  საინტერესოა, სასოფლო- სამეურნეო  სექტორიც ევროკავშირისგან  ძალიან მნიშვნელოვან დახმარებას იღებს.

როდესაც ევროკავშირი ქვეყანას კანდიდატ ქვეყნად ასახელებს, მიზნად ისახავს იმას, რომ  ეს  ქვეყნები ევროკავშირის  ქვეყნის  სტანდარტებს მაქსიმალურად  დაახლოოს და ეკონომიკური  პოლიტიკური,  სამართლებრივი, სოციალური  თვალსაზრისით ევროკავშირის  დონეზე მიიყვანოს“, - აღნიშნა გიგი გიგიაძემ.

მიუხედავად იმისა, რომ ევროკომისიის შეფასება, რომელიც ცოტა ხანში გამოქვეყნდება, ევროკავშირის საბოლოო გადაწყვეტილებას არ ნიშნავს, მაგრამ ცხადია, რომ ევროპის საბჭოს ფორმატში ამ რეკომენდაციას აუცილებლად გაითვალისწინებენ. 27 წევრი სახელმწიფოს ლიდერებმა გადაწყვეტილება, უკრაინის, საქართველოსა და მოლდოვასთან დაკავშირებით ივნისის ბოლოს სამიტზე უნდა მიიღონ. 

 თაკო კვაჭანტირაძე