Business Insider-თან საუბრისას ლატვიის თავდაცვის მინისტრმა განაცხადა, რომ სურს სავალდებულო სამხედრო სამსახური დაბრუნდეს ქვეყანაში, რადგან რუსეთი თუ შეტევას განახორციელებს და ნატო ვერ მოახდენს სწრაფ სათანადო რეაგირებას, ლატვიის ჯარი მზად იყოს ქვეყნის ეროვნული ინტერესების დასაცავად.
ლატვიამ, რომელიც ნატოს და ევროკავშირის წევრი ქვეყანაა, 2007 წელს შეწყვიტა სავალდებულო სამხედრო სამსახური ქვეყანაში, მაგრამ ივლისის დასაწყისში, თავდაცვის მინისტრმა არტის პაბრიკმა საზოგადოებას გააცნო გეგმა, თუ როგორ აპირებს სავალდებულო სამხედრო სამსახურის დაბრუნებას ქვეყანაში 18-დან 27 წლამდე პირებისთვის. ეს ყოველივე რუსეთ-უკრაინის ომის საფრთხეებიდან გამომდინარეობს, იგი ამბობს რომ ზემოხსენებული ცვლილება მნიშვნელოვანია, რომ ლატვია „გადარჩეს“. ლატვიის პრეზიდენტი ასევე მხარს უჭერს ზემოთქმულ ცვლილებას.
Business Insider-ის ინტერვიუში არტის პაბრიკმა ასევე განაცხადა, რომ უფრო მეტ მოქალაქეს სჭირდება სამხედრო მომზადება, რათა შეძლონ რუსეთიდან მოსალოდნელი თავდასხმის მოგერიება.
პაბრიკმა ინტერვიუში ასევე განაცხადა, რომ ლატვიის ინტელიგენცია აფრთხილებს მას, რომ ნატო შეიძლება არ იყოს სათანადოდ მზად და დასჭირდეს გარკვეული დრო რუსეთიდან შეტევის მოგერიებისთვის.
„ჩვენ, რა თქმა უნდა, გამოვთვალეთ რა რაოდენობით შეიარაღებული ძალების მობილიზება შეუძლია რუსეთს 24 ან 48 საათში და ასევე ვიცით ისიც, რომ ნატოს სჭირდება გარკვეული დრო იერიშის მოსაგერიებლად. სწორედ ამიტომ ჩვენ მზად უნდა ვიყოთ ჩვენი ტერიტორიული მთლიანობის დასაცავად“- განაცხადა ლატვიის თავდაცვის მინისტრმა Business Insider-თან ინტერვიუში.
პაბრიკი მოელის, რომ პარლამენტი დაამოწმებს სავალდებულო სამხედრო სამსახურს და 2023 წლის პირველი იანვრიდან 500 მოქალაქე უკვე გაივლის სამხედრო მომზადებას.
ლატვია
