რადიო კომერსანტის გადაცემა „აგროსექტორში“ არასამთავრობო ორგანიზაციის „მწვანე პარტნიორობა მშვიდობისთვის“ დამფუძნებელმა ალექსი ნონიაძემ განაცხადა, რომ თითოეულ რეგიონს თავის განვითარების გეგმა უნდა ჰქონდეს და ამას ქალაქის მერი უნდა წყვეტდეს და არა ეკონომიკის სამინისტრო თბილისში და არც ფინანსთა სამინისტრო და თვითონ სოფელმა უნდა გადაწყვიტოს მის განკარგულებაში მანამდე არსებული საძოვრების ბედიც. ამისთვის კი გარკვეული მართვის ორგანოების შექმნაა საჭირო.

„თითოეულ რეგიონს უნდა ჰქონდეს თავის განვითარების გეგმა და ამას ქალაქის მერი უნდა წყვეტდეს და არა ეკონომიკის სამინისტრო თბილისში და არც ფინანსთა სამინისტრო, ამ უწყებების მიმართ ჩემი ღრმა პატივისცემის მიუხედავად“, განაცხადა ალექსი ნონიაძემ.

მისი თმით მნიშვნელოვანია, რომ სოფელს და მუნიციპალიტეტს საკუთარი შემოსავალი ჰქონდეს და საკუთარ განკარგულებაში არსებული საძოვრები თვითონ განკარგოს.

„რატომ გვინდა, რომ საძოვრები სოფლის სარგებლობაში გადავიდეს? ამ შემთხვევაში თვითონ სოფელი გადაწყვეტს საძოვრები თავისი მოხმარებისთვის სჭირდება, თუ იჯარით უნდა გასცეს. ამით სოფელს და მუნიციპალიტეტს თავისი შემოსავალი გაუჩნდება. სოფლის განვითარებასთან ერთად ეკონომიკის სხვა მომიჯნავე დარგებს უნდა მიექცეს ყურადღება და როგორც ფაზლი ისე უნდა აშენდეს რეგიონი. თითოეულმა რეგიონმა თვითონ უნდა განივითაროს თავი,“ განაცხადა ალექსი ნონიაძემ.

ალექსი ნონიაძემ ისიც თქვა, რომ ევროპის ბაზრის ათვისების შესაძლებლობა გვაქვს, მაგრამ ამ მომენტში და ამ შანს ვერ ვიყენებთ. თუ საერთაშორისო ბაზრის ათვისება გვინდა, რაღაც ხარისხობრივი კრიტერიუმები უნდა დავაკმაყოფილოთ, პლუს მაგას სტაბილური მიწოდება უნდა შეგვეძლოს და მასიური წარმოება.

 „მწვანე პარტნიორობა მშვიდობისთვის“ დამფუძნებელმა „კომერსანტის“ ეთერში განაცხადა, რომ ახლო მომავალში ორგანიზაცია აგრარულ საკითხთა კომიტეტისა და სოფლის მეურნეობის აკადემიაში საკუთარი ხედვის წარდგენას გეგმავს, სადაც იმ სიახლეებსა და იმ ხედვაზე ისაუბრებენ, რაც საძოვრების მართვას ეხება.

მოამზადა მაკა ბიბილაშვილმა