როგორ აღწევს დასავლური საქონელი რუსეთში – სატვირთო მანქანების რიგი საქართველოს გავლით - The New York Times სტატიას აქვეყნებს, სადაც ავტორი წერს, რომ ბევრი რამ, რაც ახლა რუსეთს სჭირდება, დასავლური სანქციებით გვერდის გავლით, საქართველოდან სატვირთო მანქანებით აღწევს რუსეთამდე. რუსეთ-საქართველოს საზღვართან ყოველდღიურად სატვირთო მანქანების გრძელი რიგი დგას. მძღოლებს რიგში დგომა დღეების განმავლობაში უწევთ და თავიანთი მანქანებით ავტომობილის ნაწილები, სამრეწველო მასალები, ქიმიური პრეპარატები და სხვა საქონელი გადააქვთ რუსეთში. რიგი თურქეთიდან იწყება და რუსეთის ქალაქებში მთავრდება, სადაც დასავლურ საქონელზე დიდი მოთხოვნაა.

NYT-ი წერს, რომ უკრაინის ომმა და დასავლურმა სანქციებმა რუსეთსა და ევროპას შორის სავაჭრო კავშირები მოულოდნელად გაწყვიტა, მაგრამ ქვეყნის ეკონომიკამ კორექტირება სწრაფად მოახერხა და იმპორტისთვის ალტერნატიული გზები იპოვა.

სტატიის ავტორი წერს, რომ საქართველო - 3,6 მილიონიანი ყოფილი საბჭოთა რესპუბლიკა, რომელსაც რუსეთთან ომი 2008 წელს ჰქონდა, რუსეთის გარესამყაროსთან დამაკავშირებელ ლოგისტიკურ არხად ჩამოყალიბდა.

სტატიაში ხაზგასმულია, რომ საქართველო და მისი მეზობელი ქვეყნები - სომხეთი და აზერბაიჯანი, რუსეთს უკრაინაში შეჭრით გამოწვეული ეკონომიკური კრიზისის გადალახვაში ეხმარებიან.

მიუხედავად იმისა, რომ ბევრმა დასავლურმა კომპანიამ რუსეთში თავისი საქმიანობა შეაჩერა, რუსეთის მთავრობა ამბობს, რომ ქვეყნის ეკონომიკა გასულ წელს მხოლოდ 3 %-ით შემცირდა. სტატიის ავტორი აღნიშნავს, რომ მიუხედავად იმისა, რომ ზრდის პერსპექტივები ბუნდოვანია კოლაფსი, რომელიც ზოგიერთმა ეკონომისტმა იწინასწარმეტყველა, დასავლეთის სანქციების პირობებში, არ შედგა.

კავკასიაში, ევროპის სამხრეთ-აღმოსავლეთ უკიდურეს ნაწილში, მდებარე საქართველო რუსეთის ერთ-ერთი მთავარი სავაჭრო რგოლი გახდა. ამის საილუსტრაციოდ NYT-ის ავტორს TBC Capital-ის კვლევა მოჰყავს. სტატიაში ნათქვამია, რომ საქართველოს წამყვანი საინვესტიციო ბანკის, TBC Capital-ის მიერ ჩატარებული კვლევის მიხედვით, 2022 წლის პირველი ექვსი თვის განმავლობაში თურქეთსა და რუსეთს შორის ტვირთების ტრანზიტი სამჯერ გაიზარდა და მისი დიდი ნაწილი საქართველოს გზებზე გადიოდა.

როგორც NYT-ის სტატიაში ვკითხულობთ, შეუძლებელია იმის თქმა, რამდენად ექვემდებარება საქართველოდან გადასული ევროპული ტვირთი ევროკავშირის სანქციებს, მაგრამ საქართველოს მაგალითიდან გამომდინარე ევროკავშირის სანქციების პოტენციური ხარვეზები სახეზეა.

„საქართველოს მთავრობამ აღნიშნავს, რომ ისინი მკაცრად აღასრულებენ დასავლეთის სანქციებს და ხშირად გადაზიდვებს აუქმებენ, მაგრამ პარლამენტში მმართველი პარტიის ოპონენტები ამბობენ, რომ რუსეთში საქონელი და ფული შეუფერხებლად მიედინება“, - წერს NYT-ი. 

NYT-ი აღნიშნულ საკითხთან დაკავშირებით სტრატეგიული კვლევების საერთაშორისო ინსტიტუტის უფროს მკვლევარ მარია შაგინას ესაუბრა. შაგინას თქმით, საქართველო ახორციელებს დამაბალანსებელ რგოლს მის ოფიციალურ პროდასავლურ ორიენტაციასა და რუსეთზე ეკონომიკურ დამოკიდებულებას შორის.