ვროპარლამენტის საგარეო ურთიერთობათა კომიტეტის სხდომაზე, ევროპარლამენტარებმა განიხილეს საქართველოს მიერ ევროკავშირის ასოცირების შეთანხმების შესრულების ყოველწლიური ანგარიშის პროექტი, რომელიც საფუძვლად უნდა დაედოს ევროპარლამენტის რეზოლუციას.

როგორც ანგარიშის ავტორმა, საქართველოს საკითხებზე მომხსენებელმა, ესტონელმა ევროპარლამენტარმა სვენ მიკსერმა (სოციალისტებისა და დემოკრატების პროგრესული ალიანსი) განაცხადა, ანგარიში დიდწილად ეყრდნობა ევროკომისიის შეფასებებს, რომლებიც მოჰყვა საქართველოს განაცხადს ევროკავშირში გაწევრიანების შესახებ.

როგორც მიქსერმა აღნიშნა, რეზოლუციაში რამდენიმე მნიშვნელოვანი ელემენტია, რომელიც მიესალმება ევროსაბჭოს გადაწყვეტილებას საქართველოს ევროპულ პერსპექტივასთან დაკავშირებით. ამასთან, მიქსერის თქმით, იმისთვის, რომ საქართველომ მიიღოს კანდიდატის სტატუსი, ქვეყანამ წარმატებით უნდა უპასუხოს მნიშვნელოვან პრიორიტეტებს, რომელიც მითითებულია კომისიის მოსაზრებაში.

ევროპარლამენტარის განცხადებით, რეზოლუცია მოუწოდებს საქართველოს ხელისუფლებას, დაიცვას დემოკრატიის უმაღლესი სტანდარტი, კანონის უზენაესობა და ფუნდამენტური თავისუფლება, რომელიც კომისიის მოსაზრებაშია მითითებული და აჩვენოს ამბიციური ევროპული მისწრაფება.

„ანგარიშის პროექტში წუხილია გამოთქმული, რომ სიღრმისეული პოლარიზაცია კვლავ არის საქართველოს პოლიტიკური გარემოს განმსაზღვრელი მახასიათებელი. დოკუმენტი კიდევ ერთხელ იმეორებს, რომ ევროკავშირის შუამავლობით მიღწეული, 2021 წლის 19 აპრილის შეთანხმების ძირითადი დებულებები კვლავ წარმოადგენს გზას საქართველოში დემოკრატიისა და კანონის უზენაესობის განმტკიცებისკენ.

რეზოლუციაში წერია, რომ საქართველოს პოლიტიკურ ცხოვრებას ისევ ახასიათებს ღრმა პოლარიზაცია. აღნიშნულია, რომ 2021 წლის 19 აპრილის შეთანხმების შესრულება კვლავ რჩება საქართველოში დემოკრატიისა და კანონის უზენაესობის გაძლიერების გზად.

ამასთან, რეზოლუცია ასევე ხაზს უსვამს სასამართლო რეფორმის შესრულების აუცილებლობას. ის მოუწოდებს მთავრობას, უპასუხოს იმ ხარვეზებს, რომელიც დადგენილ იქნა ვენეციის კომისიის მიერ ყველა დონეზე მოსამართლეთა წარდგენისა და დანიშვნის შესახებ, ასევე ეს ეხება გენერალური პროკურორის დანიშვნას იმისთვის, რომ პროცესი სრულ თავსებადობაში იყოს ევროპულ სტანდარტებთან.

რეზოლუცია ასევე მოუწოდებს იუსტიციის უმაღლესი საბჭოს საფუძვლიანი რეფორმის გატარების აუცილებლობაზე და საბჭოს დარჩენილი წევრების დანიშვნაზე. ნაჩქარევი და არაგამჭვირვალე ნაბიჯები საკვანძო დანიშვნების ან ინსტიტუციური ცვლილებების დროს მხოლოდ აძლიერებს პოლიტიზებული მართლმსაჯულების სისტემის აღქმას. კერძოდ, უზენაესი სასამართლოს მოსამართლების დანიშვნა ოდირისა და ვენეციის კომისიის მიერ გამოვლენილი ხარვეზების გასწორებამდე. რეზოლუცია იმეორებს, რომ სასამართლო რეფორმების პროცესში პროგრესის ნაკლებობა ნიშნავდა, რომ 2021 წლის სექტემბრისთვის ევროკავშირის მაკროფინანსური დახმარების 75 მილიონი ევროს ტრანშის მისაღებად დაწესებული პირობები არ შესრულებულა.

რეზოლუცია მოუწოდებს საქართველოს ხელისუფლებას, ეფექტურად გამოიძიოს 2021 წლის სექტემბერში გამოვლენილი მასობრივი უკანონო მოსმენების საქმე და შეშფოთებას გამოთქვამს საქართველოს სისხლის სამართლის საპროცესო კოდექსში შეტანილი ცვლილებების გამო, რაც ზრდის დანაშაულთა რაოდენობას, რომელზეც ნებადართულია ფარული საგამოძიებო ქმედებების ჩატარება და ამ მოქმედებების ხანგრძლივობა.

რეზოლუციაში აღნიშნულია, რომ მნიშვნელოვანია საქართველოს სახელმწიფო ინსტიტუტებზე დამოუკიდებელი ზედამხედველობის განხორციელება; ამ მხრივ, სინანულს გამოხატავს სახელმწიფო ინსპექტორის სამსახურის გაუქმების გამო ODIHR-ის რეკომენდაციების საწინააღმდეგოდ; ხაზს უსვამს საქართველოს სახალხო დამცველის დადებით როლს ადამიანის უფლებების დაცვაში, კარგი მმართველობის ხელშეწყობასა და კანონის უზენაესობის განმტკიცებაში“, – განაცხადა სვენ მიქსერმა.