„ოცნება“, უკვე ორი დღეა, ღიად უშლის ხელს ოპოზიციის ინიციატივას - შეიქმნას საპარლამენტო კომისია სასამართლო სისტემაში შესაძლო დანაშაულების გამოსაძიებლად. ის, რასაც მმართველი პარტია მოსამართლეებისთვის „პოლიტიკურ სოლიდარობას“ ეძახის, ოპოზიციისთვის „სასამართლო კლანის“ მფარველობის მკაფიო გამოხატულებაა.
18-19 აპრილს, უმრავლესობის დეპუტატებმა უარი თქვეს რეგისტრაციაზე, რომელიც კენჭისყრის წინ გასავლელი სავალდებულო პროცედურაა. კვორუმი ვერ შედგა და სხდომაზე კენჭი ვერც საგამოძიებო კომისიის შექმნას უყარეს და ვეღარც რიგში მდგომ კანონპროექტებს.
ექსპერტებისა და ოპოზიციონერი პოლიტიკოსების შეფასებით, ხელისუფლების ეს სვლა კონსტიტუციასთან შეუსაბამოა და პარლამენტის საქმიანობასაც აზარალებს.
როდემდე შეიძლება გაგრძელდეს ასე და რა შეიძლება გამოიწვიოს „ოცნების“ ბოიკოტმა?
„არ დავუშვებთ“, „არ შევაქმნევინებთ“
„ჩვენ კიდევ ერთხელ ვუცხადებთ მხარდაჭერას სასამართლოს დამოუკიდებლობას და სოლიდარობას ქართველ მოსამართლეებს და აქედან გამომდინარე, დღესაც, რა თქმა უნდა, საპარლამენტო უმრავლესობა არ გაივლის რეგისტრაციას“, - „ქართული ოცნების“ თავმჯდომარის, ირაკლი კობახიძის ამ სიტყვებს, 19 აპრილს, სხდომათა დარბაზში სიცილი და ტაში მოჰყვა, მაგრამ არა მოულოდნელობის გამო - რეგისტრაცია „ოცნებამ“ არც 18 აპრილს გაიარა და წინასწარვე განაცხადა, რომ ოპოზიციის განზრახვას ნებისმიერი ხერხით შეუშლის ხელს.
„ჩვენ მზად ვართ, ნებისმიერ თემასთან დაკავშირებით განვიხილოთ საგამოძიებო კომისიის შექმნა, მაგრამ ვერავითარ შემთხვევაში ვერ განვიხილავთ კოლექტიური „ნაცმოძრაობის“ მიერ კომისიის შექმნას სასამართლოსთან დაკავშირებით. ვირს კრიალოსანზე კომისიას არ შევაქმნევინებთ, ეს არის ჩვენი პრინციპული პოლიტიკური პოზიცია“, - თქვა "ქართული ოცნების" თავმჯდომარემ, ირაკლი კობახიძემ.
„ნაცები“ სასამართლოზე საპარლამენტო კომისიას ქმნიან, ეს არის თანამედროვეობის პარადოქსი და ასეთ პარადოქსებს ჩვენ არ დავუშვებთ, იმიტომ ვართ ხელისუფლებაში“, - განაცხადა „ქართული ოცნების“ ფრაქციის თავმჯდომარემ, მამუკა მდინარაძემ.
„ყველაფერი უნდა გავაკეთოთ, რომ ეს არ შედგეს, რადგან ძალიან მავნებლური ინიციატივაა. ძალიან სახიფათო პრეცედენტი შეიძლება გააჩინოს, როდესაც სასამართლო ხელისუფლების ავკარგიანობის შესახებ ცალკეული მოსამართლეების ანგარიშვალდებულება გავაჩინოთ პარლამენტში“, - განაცხადა მიხეილ სარჯველაძემ, ადამიანის უფლებათა კომიტეტის თავმჯდომარემ.
„როგორც გამოჩნდა, „ქართულმა ოცნებამ“ გადაწყვიტა, რომ ბოლომდე გადაეფაროს სასამართლოს კლანს და დაიცვას სანქცირებული მოსამართლეები... კლანს აჩვენებენ - თქვენ ხელშეუხებლები ხართ, თქვენ ჩვენ გიცავთ“, - აცხადებს „რეფორმების ჯგუფის“ თავმჯდომარე, დეპუტატი ხათუნა სამნიძე.
საგამოძიებო კომისიის შექმნის ინიციატივა ამჯერად სწორედ „რეფორმების ჯგუფმა“ წამოაყენა, თუმცა მას მხარდაჭერა მალევე გამოუცხადა ოპოზიციის უდიდესმა ნაწილმა და როგორც სამნიძე ამბობს, გროვდება საკითხის გასატანად საჭირო ხმების რაოდენობა. ხელისუფლების ქმედებებში სხვებიც "კლანის" მფარველობას ხედავენ.
ვრცლად იხილეთ www.radiotavisupleba.ge