კორონავირუსის პანდემია ავიაკომპანიებისთვის ერთ-ერთი ყველაზე რთული გამოწვევა აღმოჩნდა. თუმცა მსოფლიოს მასშტაბით ვაქცინაციის პროცესმა და „მწვანე პასპორტების“ ამოქმედებამ იმის იმედი გააჩინა, რომ თვითმფრინავით გადაადგილება ისეთი რისკების შემცველი აღარ არის, როგორც ეს თუნდაც პანდემიის საწყის ეტაპზე იყო.
ავიაკომპანიების დიდმა ნაწილმა სცადა ფეხი აეწყო გამოწვევებისთვის და თვითმფრინავების სალონები „კოვიდ-ადაპტირებული“ გაეხადა.
გამოცემა CNN გთავაზობთ ბიზნეს-კლასის სავარძლების დიზაინს, რომელთა ხილვაც თვითმფრინავებში 2025 წლიდან უკვე შესაძლებელი იქნება.
CNN წერს, რომ წარმოდგენილი ნიმუშების მიხედვით, ყველაზე დიდი ყურადღება პანდემიისგან დაცულობას, კომფორტულ სავარძლებსა და ეკოლოგიას ეთმობა.
დაცულობა
სტატიის მიხედვით, 2025 წლისთვის ბიზნეს-კლასის სავარძლები ერთმანეთისგან კიდევ უფრო გამოყოფილი და იზოლირებული იქნება, რათა მგზავრებმა თავი უფრო დაცულად იგრძნონ. იმის მიუხედავად, რომ 2025 წლისთვის კორონავირუსის პანდემია დიდი ალბათობით, დასრულებული იქნება, ადამიანების ფსიქოლოგიაში იზოლირებული სივრცის მოთხოვნა მაინც დარჩება.
ზოგიერთი კომპანია განიხილავს დიზაინს, რომლის მიხედვითაც, თითოეულ სავარძელს გასასვლელთან საკუთარი კარი ექნება.
ეკოლოგია
გამოცემა წერს, რომ ბიზნეს-კლასის სავარძლები უახლოეს მომავალში კიდევ უფრო კომფორტული და ეკო-მეგობრულები გახდებიან. ავიაკომოპანიები მაქსიმალურად შეეცდებიან სავარძლები და ყველა საჭირო აღჭურვილობა ეკოლოგიური მასალებისგან დაამზადონ, რათა მგზავრებსა და გარემოს რაც შეიძლება ნაკლები ზიანი მიადგეთ.
ტექნოლოგიები
როგორც ცნობილია, ახალი სავარძლები უფრო დიდი ზომის მონიტორებით იქნება აღჭურვილი, რათა ხანგრძლივი მგზავრობა უფრო კომფორტული გახდეს.
ამასთან, დიზაინი შეეცვლება ბიზნეს-კლასის მაგიდებსაც, სადაც ლეპტოპებისა თუ ტაბების განთავსება უფრო მარტივი იქნება. ამ ცვლილების მიზანია, ფრენის დროს მგზავრებმა დრო არ დაკარგონ და მუშაობა თვითმფრინავშიც შეძლონ.
წყარო "ბიზნესპრესნიუსი"