პროტესტის ფონზე გაცემული დაპირებისამებრ, დღეს საპარლამენტო უმრავლესობა ე.წ აგენტების კანონპროექტის ჩაგდება გეგმავს. რა პროცედურების შედეგად უნდა მოხდეს კანონპროექტის საბოლოო „გაუვნებელყოფა“. აღნიშნული წესების და პროცედურების თანმიმდევრობაზე „კომერსანტის“ ეთერში იურისტმა ლევან ალაფიშვილმა ისაუბრა.
„ძალიან კარგია, რომ პროტესტის ფონზე შინაარსზე უფრო მეტი აქცენტი გაკეთდა, ვიდრე პროცედურებზე. უმრავლესობის მხრიდან პლენარული სხდომის თარიღად თავიდან 21 მარტი დასახელდა, მაგრამ დღეს უკვე ვიცით, რომ ეს საკითხი არსებითად დღეს გადაწყდება. დღეს პარლამენტის მთავარი ორგანიზაციული უზრუნველმყოფი ფორმატი - ბიურო დაამტკიცებს დღის წესრიგს პლენარულის სხდომისთვის. პლენარული სხდომა ამ დღის წესრიგით წარმართავს საქმიანობას და დადგება საკითხი კენჭისყრაზე. იმედი მაქვს, რომ დარჩენილ პროცედურულ მანიპულაციებს ადგილი არ ექნება. ეს მანიპულაციებია, რომ პარლამენტის სხდომაზე არ მივიდნენ, რეგისტრაცია არ გაიარონ... იმედი მაქვს ყველა წესი იქნება გავლილი იმისთვის, რომ არ დარჩეს რაიმე თუნდაც მცირედი, რომელიც რევიზიის და უკან დაბრუნების საშუალებას მისცემს და ოდესმე ვინმეს თავში აზრად მოუვა რუსული კანონების და რუსული სტანდარტების საქართველოს სამართლებრივ სივრცეში შემოტანა,“- განაცხადა ლევან ალაფიშვილმა.
იურისტის თქმით, აღნიშნული პროცესები წესით დროში არ უნდა გაიწელოს და დღის პირველ ნახევარში უნდა დასრულდეს.
„დაახლოებით პირველი საათისთვის ჩვენ უნდა გვქონდეს შედეგი, იმ იმედით რომ სხვა მანიპულაციები არ იქნება გამოყენებული. ასეთი ტიპის კანონპროექტები დამსწრეთა უმრავლესობით მიიღება, მაგრამ არანაკლებ პარლამენტის 1/3-ით, 50-ზე ნაკლები ხმა უკვე ნიშნავს ჩაგდებას. მაქსიმალური კვორუმიდან თუ ვიანგარიშებთ 139 დეპუტატია ასეთი და თუკი ყველა დაესწრება სხდომას 68 არის ზედა ზღვარი, ამაზე მეტი თუ მისცემს ხმას კანონპროექტი მიღებულად ითვლება. არც სხდომის გახსნის და არც გადაწყვეტილების კვორუმთან დაკავშირებით ოპოზიციის ხმებს არსებითად საკითხის შეცვლა არ შეუძლია, სამართლებრივი მხრივ მნიშვნელობა არ აქვს, თუმცა განუზომლად დიდია მათი მონაწილეობა პოლიტიკური თვალსაზრისით,“- აღნიშნა ალაფიშვილმა.
შესაძლებელია თუ არა ამ საკითხის უკან დაბრუნება გარკვეული პერიოდის შემდეგ, არსებობს თუ არა ამის შემზღუდავი საშუალებები.
„ეს ის საკითხია, რომლის გადაზღვევაც შეუძლებელია. თუკი ამაზე დავიწყებთ მსჯელობას ეს ნიშნავს, რომ დეპუტატს შეუზღუდო საკანონმდებლო ინიციატივის უფლება. როგორ შეგიძლიათ წარმოიდგინოთ, რომ ეს კონსტიტუციური უფლება არ განახორციელოს არასდროს. გაცოცხლების შემთხვევაში მისი განხილვების პროცედურები სულ თავიდან იწყება და არა მგონია ვინმეს ეყოს იმის პოლიტიკური რესურსი, ლეგიტიმაცია და სამოქალაქო პასუხისმგებლობა, რომ რაც 3 დღის განმავლობაში მიდიოდა, კვლავ დააპიროს და აზრად გაივლოს ხელახლა ამ პროცესის შებრუნება. უფრო გაბრაზებული ახალგაზრდები ამას აღარ აპატიებენ,“- აცხადებს იურისტი.
რაც შეეხება უმრავლესობის მიერ დაანონსებულ რეგიონში გასვლას და მოსახლეობისთვის კანონპროექტის სიკარგეებზე საუბარს. ალაფიშვილი მიიჩნევს, რომ ეს მხოლოდ პიარ-სვლაა:
„ეს არის პიარ-სვლა საკუთარი სახის შესანარჩუბლად. რეგიონებში თბილისზე არანაკლები პროტესტი იყო და იქ არანაკლებ მძიმე კითხვებზე მოუწევთ პასუხის გაცემა და იქით არ გადაარწმუნონ,“- აღნიშნა ალაფიშვილმა.