რამდენად შეესაბამება მთავრობის მიერ დაანონსებული ფასების დარეგულირება საბაზრო ეკონონომიკის პრინციპებს და რამდენად მართებულია ამის გამართლება ევროდირექტივებით. ამასთან დაკავშირებით ექსპერტებს შორის აზრთა სხვადასხვაობაა, ნაწილი რეგულაციებს გარკვეულწილად ემხრობა და ამას მომხმარებლების უფლებების დაცვის საბაბით ხსნის. მეორე ნაწილს კი მიაჩნია, რომ მსგავსი ნაბიჯები ქვეყანას საბაზრო ეკონომიკას აშორებს და შერეული ეკონომიკის მქონე ქვეყნების რიგში გადაყავს. ამასთან, როგორც ეკონომისტთა ნაწილი მიიჩნევს განვითარებულ ქვეყნებში მოქმედი დირექტივების განვითარებად ქვეყანაში პირდაპირ გადმოტანა არამართებულია.

ექსპერტებისგან განსხვავებით პრემიერის დაანონსებულ საკანონმდებლო  ცვლილებაზე, რომელიც  „სამართლიანი ვაჭრობის“ შესახებ ევროდირექტივის დანერგვას გულისხმობს, კომენტარის გაკეთებისგან თავს იკავებენ კანონმდებლები.

როგორც დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილმა „კომერსანტთან“ განაცხადა, საკანონმდებლო ცვლილებაზე მსჯელობა შესაძლებელი იქნება მას შემდეგ რაც ის პარლამენტში დაინიცირდება.  პარლამენტში პროექტის შესვლის შემდეგ გეგმავს თემაზე კომენტარის გაკეთებას მისი თანაპარტიელი და ეკონომიკის კომიტეტის წევრი ნინო წილოსანიც.