„შესაძლოა, მიზანშეწონილია მარცვლეულის გატანის შეზღუდვა უკრაინიდან, გავივლი ამაზე კონსულტაციებს ერდოღანთან“, - ციტირებს რუსეთის პრეზიდენტს RIA-ს Telegram არხი. თუმცა მანამდე რუსულ მედიაში გაჩნდა დაუდასტურებელი ინფორმაციები, რომ რუსეთი უკრაინული მარცვლეულის ექსპორტს შეაჩერებს, მიზეზად კი რუსული ხორბლის რეალიზაციის პრობლემები იყო დასახელებული.
„პუტინი უკრაინული მარცვლეულის მიწოდებაზე დასავლეთისთვის მოშიმშილე ქვეყნების ნაცვლად: შესაძლოა, მიზანშეწონილია მარცვლეულის გატანის შეზღუდვა უკრაინიდან, გავივლი ამაზე კონსულტაციებს ერდოღანთან“- აღნიშნულია ელვა შეტყობინებაში რასაც Telegram არხი ავრცელებს.
„მიუხედავად უკრაინის ირგვლივ მიმდინარე მოვლენების სირთულეებისა, ჩვენ ყველაფერი გავაკეთეთ იმისთვის, რომ უკრაინული მარცვლეულის ექსპორტი მომხდარიყო. მე შევხვდი აფრიკის კავშირის, აფრიკის სახელმწიფოების ლიდერებს და დავპირდი მათ, რომ ყველაფერს გავაკეთებდით იმისთვის, რომ უზრუნველყოფილი ყოფილიყო მათი ინტერესები და ხელი შეგვეწყო უკრაინული მარცვლეულის ექსპორტისთვის. ჩვენ ეს ინსტრუქციის გარეშე გავაკეთეთ“, - განაცხადა პუტინმა მე-7 აღმოსავლეთ ეკონომიკური ფორუმის პლენარულ სხდომაზე.
მისი თქმით, შედეგად, უკრაინიდან ექსპორტირებული მთელი მარცვლეული იგზავნება არა განვითარებად ქვეყნებში, არამედ ევროკავშირში.
შეგახსენებთ, რუსეთის უკრაინის ტერიტორიაზე შეჭრისა და საომარი მოქმედებების დაწყების შემდეგ უკრაინული პორტები დაბლოკილი იყო და ქვეყანა სასურსათო პროდუქტების და მათ შორის მარცვლეულის ექსპორტს ვერ ახერხებდა. ამან კი მსოფლიოს სასურსათო უსაფრთხოება დიდი რისკის ქვეშ დააყენა, რადგანაც უკრაინა მარცვლეულის ერთ-ერთი უმსხვილესი ექსპორტიორია მსოფლიოში. შედეგად ხორბლის და ზოგადად სურსათის ფასებმა მსოფლიოს ბაზარზე ზრდა დაიწყო.
სიტუაციის რეგულირებისთვის რამდენიმე ოთხმრივი შეხვედრა გაიმართა, რომელშიც უკრაინის, რუსეთის, თურქეთის და გაეროს მაღალჩინოსნები მონაწილეობდნენ. საბოლოოდ კი „მარცვლეულის დერეფანზე ოთხმრივი შეთანხმება შედგა. რომ „მარცვლეულის დერეფნის“ შეთანხმებას ხელი 22 ივლისს სტამბოლში, თურქეთის პრეზიდენტის რეჯეფ თაიფ ერდოღანისა და გაეროს გენერალური მდივნის ანტონიო გუტერეშის თანდასწრებით მოეწერა. დოკუმენტს ხელი მოაწერეს თურქეთის, უკრაინის, რუსეთის და გაეროს წარმომადგენლებმა.
დოკუმენტზე ხელმოწერის შემდეგ კი უკრაინის პორტებიდან მარცვლეულის გამოტანა ეტაპობრივად დაიწყო და ბოსფორის გავლით ის მთელს მსოფლიოს მიეწოდება.