საქართველოს პარლამენტის თავმჯდომარე შალვა პაპუაშვილმა ჟურნალისტებთან განაცხადა, რომ რუსეთიდან ქვეყნის მოქალაქეების შემოდინებაზე საუბარი მთავრობის დისკრედიტაციის მცდელობის ნაწილია, მისივე თქმით რუსეთთან სახმელეთო მიმოსვლა რუსეთის მხრიდან არის ჩაკეტილი და მხოლოდ სატვირთო გადაზიდვები ხდება.
„ეს საკითხი, რაც შეეხება ე.წ. მასობრივ შემოსვლას, არის ნაწილი იმ დისკრედიტაციისა, რაც გვაქვს მთავრობის წინააღმდეგ და ეს არის სწორედ ის, რაც იწვევს ჩვენში კითხვის ნიშნებს, რატომ ხდება ხოლმე ასეთი ინფორმაციის გავრცელება. არანაირ მასობრივ შემოდინებასთან საქმე არ გვაქვს. რუსეთთან სახმელეთო საზღვარი ჩაკეტილია, სხვათა შორის რუსეთის მხრიდან, ლარსის საზღვარზე გადმოდის მხოლოდ ტვირთი და არ არის კერძო მიმოსვლა. რაც შეეხება მონაცემებს, გუშინ იყო განხილვის საკითხი ეს თემა და დეზინფორმაციის ნაწილია, რომ საზოგადოებაში შემოვიდეს შფოთი, არ იყოს სიმშვიდე და მშვიდობა. მე მოვუწოდებ მედიას, რომ არ გავრცელდეს გადაუმოწმებელი ინფორმაცია და არ მოხდეს სიტუაციის დრამატიზება. “, - განაცხადა შალვა პაპუაშვილმა.